近排好多高官名人成日叫市民留港消費，但董特首自己就講一套做一套，上禮拜四復活節長假未始，就攞咗假同老婆及兩個乖孫齊齊飛去大陸。
早喺阿董上禮拜三公布離港休假時，好多傳媒已不斷追問佢今次又會去大陸邊處名山大川遊玩？但苦苦追問都不得要領，阿董似乎有意避開傳媒。
卒之到噚日，《文匯報》就以頭版報道阿董伉儷嘅休假行蹤，原來佢哋去咗上海，禮拜五晚佢重接受上海市委書記黃菊及市長陳良宇宴請㖭。
唔知點解咁啱，阿董去上海，前港督肥彭亦喺上海，兩個人同一日前後腳抵達上海，又係同一日與陳良宇見面。唔通佢兩位一早約定偷偷喺上海「私會」？兩人如果見面，阿董會唔會向肥彭傾吓部長制盤棋如何布局，或者請肥彭教番幾招公關秘笈，以便一展身手呢？
要知道，肥彭今時唔同往日，已經由過去嘅「千古罪人」搖身變成中南海座上貴賓，下個禮拜重會同江主席見面。玩政治呢家嘢，最緊要係識睇風頭火勢，老董如果醒目，何樂而不為？
E-mail：