昨日天氣唔係咁好，落雨濕濕，為搞戶外活動的人增添不少麻煩。八方噚日去聖約翰爵士敬老嘉年華會，大會請到律政司司長梁愛詩去主禮，但係落雨就搞到全部人擔晒遮，認真掃興。
嘉年華會期間，一向打扮奇異的白韻琴突然出現在主禮台前，令原本濕悶的氣氛熱鬧起來。白姐姐趁復活佳節，將自己打扮成兔女郎咁，頭戴兔耳飾物、配埋條粉紅色短褲、patpat貼上一嚿大棉花做兔尾，腰間再掛住隻白兔公仔，問你點頂。
點解白姐姐會出現？事關噚日個活動其中一個贊助商係「盡訴心中情基金會」，基金會在九九年由白姐姐同佢男友阿paul謝偉俊一齊成立，咁佢上台攞紀念品都好理所當然。難得嘅係梁愛詩頒紀念品畀白姐姐時，仍可以忍得住笑。
噚日嘅敬老活動，連好多平日冇乜點蒲頭的外國駐港領事也出席，包括斐濟群島、阿曼、馬里、西非馬里、馬爾他同北韓等都畀面出席，認真難得。
（圖）六十二歲的詩姐姐頒紀念品畀五十七歲的白姐姐，雖然佢兩個年紀唔差得好遠，但前者衣着保守，後者則經常畀人驚喜。
E-mail：