由細到大都覺得當初發明「麻雀」嗰位仁兄或仁姐應獲頒一個諾貝爾獎，因為呢個遊戲（或應稱為藝術）影響咗好多人、好多年。
另外一位應該獲得提名嘅就係發明「滑板」嗰位朋友。當初只係一塊板四個轆咁滑嚟滑去，殊不知呢樣玩意影響深遠，輾轉已成為一種文化，締造了年輕人的服裝打扮，亦改變了很多運動的本來面貌。
滑水與滑雪某程度上都已經「板」化了，這次到北海道滑雪，發覺已差不多有一半人在玩滑雪板，玩傳統雪橇的人則愈嚟愈少。老實講，如果係高手玩得叻的話，踩雪橇確係比較「瀟」，可惜此物易學難精，對我等亞熱帶居民來說，一年最多可以滑嗰兩、三日雪，好難可以練到去「瀟」嘅境界。滑雪板表面上較難學，其實比雪橇易控制，雙腳踩住一塊熨衫板咁大嘅滑雪板，要行要停都比窄長的雪橇易發力。
滑板的服裝也較「型」，衫褲都被傳統滑雪蚧乸衣闊身得多，尤其係對鞋，比起穿那雙滑雪橇的雪靴舒服何止十倍。切勿穿厚身羽絨褸去滑雪，因為運動量大，很快便會一身大汗，其實一件防水的Gortex風衣再加一件衞衣便很足夠。雪褲則唔好慳，尤其係初學者，因為會發覺大部份時間都坐在雪上，如果條褲滲水的話，擔保閣下得到一個「急凍屁股」。