近日高唱「名利可以輕放手」嘅電盈副主席張永霖，成為董特首部長制嘅大熱人選，但佢忽然又大吹淡風，令事件顯得撲朔迷離。
八方聞說張永霖近日頻頻約高官政界人士飯局，上個禮拜復活節假期前夕，佢老哥興致勃勃請客，席間猛人包括經濟局局長葉澍堃、港交所行政總裁鄺其志，重有一眾立法會議員。有政界中人一見張永霖，更立刻恭喜他出任部長，點知佢即刻澄清，話自己唔會做部長喎。
有老友同八方講，張永霖同電盈份合約至年中便到期，以佢唔甘心做阿二嘅性格，好大機會另謀高就；而政府官職就最啱畀既有名又有利嘅打工皇帝發展，阿松就係最好例子。
早在上月初，張永霖接受傳媒訪問時，已表明心迹，佢當時話有機會也會考慮加入官場；及至上月底佢出席電盈業績記者會時，佢對部長之說依然是笑而不語，當記者問佢會否棄商從政學阿松時，佢重話自己有名有利，已經心無所求。八方不少老友都相信張永霖最後會在官場謀一官半職。
點知話口未完，張永霖就對住啲議員轉口風，不禁令人懷疑佢故弄玄虛，還是與董談不攏。但據八方所知，張永霖約政界人士飯局時，席間並冇提到任何電盈大計。
（圖）張永霖近日頻頻約高官政界人士飯局大吹淡風，令部長制事件更加撲朔迷離。
E-mail：