快將被全新RX-8跑車取代嘅萬事得RX-7，廠方將於嚟緊嘅4月22日推出SpiritR限量特別版，以紀念呢部叱咤車壇嘅高性能跑車。
限量生產嘅RX-7SpiritR跑車將會分為三個型號，當中包括兩座位配5前速手波嘅TypeA、四座位配5前速手波嘅TypeB型號，以及四座位配4前速自動波箱嘅TypeC型號等等；外形設計雖與現有嘅RX-7相近，但當你細心留意下，就會發覺新車改用上四輪17吋BBS合金軨，望落可謂霸氣十足。至於車廂方面，廠方除為其裝上不少電鍍裝飾外，當中TypeA型號更會裝上輕量化Recaro桶椅，以及專用嘅表板等布置，一派高性能跑車形象表露無遺。而新車則仍然以一台原有嘅引擎配搭，馬力輸出由255匹至280匹，令新車可有更出色嘅性能表現。加上新車係以限量發售，因而更見矜貴；未知香港嘅車迷，有無機會一睹此車嘅風采呢？