復活節總會令大家聯想起兔仔，亦不其然引起大家想養兔仔的意欲，不過好多人都會嫌養小動物麻煩而打消念頭。就趁復活佳節，小記請嚟幾位極愛兔仔嘅主人同大家分享養兔仔的經驗同心得，佢哋異口齊聲都話兔仔活潑可愛，而且比起其他如貓、狗等小動物更加易照顧，聽完佢哋嘅分享，連小記都心郁郁想養番隻！
記者：許穗齡 攝影：林栢鈞
海棠兔最易同其他品種分辨，因為佢有一個大大的黑眼圈，同身上幾乎全白的毛恰好成為對比。海棠兔屬短毛品種，唔使日日梳毛，比較易打理。
品種：海棠兔
年齡：5個多月
姓別：男
同種售價：$600-$900（Petegg）
Dogo養有兩隻兔仔，一隻係海棠兔、一隻係獅子兔，兩隻都屬迷你品種，身長最多只有約10吋左右，Dogo話迷你種的兔仔天生頑皮同粗魯，不過佢個人就鍾意細隻，貪佢可愛啲同埋易打理。
獅子兔亦屬短毛品種，但由於腮位附近的毛特別長，有點似獅子，因此而命名。Dogo又提醒大家，唔好忽略餵兔仔食草，因為兔仔食多啲草可以磨牙，令到牙齒唔會生得過長，以免對佢自己造成傷害。
品種：獅子兔
年齡：5個多月
姓別：女
同種售價：$399-$800（Petegg）
灰白色的波子屬普通的侏儒兔品種，唔好睇佢外表好似好乖咁，佢都幾頑皮㗎！Sandy重話兔仔喜怒都形於色，開心時就會成隻彈起，唔開心就會呆呆哋甚至用後腳大力踏地，聽落都覺得好搞笑。重有，原來小兔腸胃麻麻，千祈唔好亂咁餵新鮮生果，否則好易肚屙。
品種：侏儒兔
年齡：半歲
姓別：男
同種訂購價：$300-$600（Petegg）
Sandy大大話話養過5隻兔仔，對兔仔性格可為非常了解，佢話兔仔一般妒忌心重，經常會呷醋，所以如果屋企同時養咗其他小動物的話，千祈唔好厚此薄彼！就算幾攰，每日都要抽時間陪佢哋玩或者抱吓佢哋先得㗎！
Chris所養的樂樂，拍攝當日真係唔多快樂，不斷發抖，好似好驚咁。Chris話可能純白兔本身較細膽，佢又少帶樂樂出街。純種白兔就是紅眼睛白毛毛，亦屬侏儒及短毛種，一般照顧都方便容易。
品種：侏儒純白兔
年齡：6個月
姓別：男
同種訂購價：$300-$600（Petegg）
Chris就話兔仔比起其他小動物重有一大分別，就係特別多屎尿，不過好彩兔仔一般較聰明，尤其是對於大小二便都好易掌握，教佢哋一兩次已經識得去，所以整體上來講都算易打理。
白色加啡色毛的拖肥，屬長毛品種，需要同佢日日梳毛，否則長毛就會好易打結，到時兔仔自己去抓的話就好易整親。主人話安哥拉兔仔有時睇落有啲似狗仔，而且毛毛更會長到見唔到眼睛，笨笨哋幾可愛。
品種：安哥拉中型
姓別：男
年齡：6個多月
同種售價：$250-$350（Petegg）
兔仔出名蹦蹦跳，其實佢哋的確需要好多運動，亞琛養的拖肥尤其坐唔定，每日都必定要放佢出籠走走，而且佢亦特別難控制，想抱佢上手玩都要有一定嘅技巧。
店主說侏儒兔一向受香港人歡迎，皆因的的骰骰夠晒得意。深啡色侏儒兔屬美國加荷蘭種，由大陸培養，毛毛短易打理，而且深色毛更襟污糟，唔使成日洗身，一般侏儒兔最長約10吋。
貓貓兔屬近年較新嘅品種，屬小型中毛兔，此批同樣由美國加荷蘭種於大陸培養，貓貓兔最大特點是毛毛生得較鬆散，即係鬆毛，亂亂哋都幾可愛。拍攝當日籠裏面兩隻貓貓兔都異常活躍，輪流圍住籠邊跑，真係活力十足。
兔主人Sandy就極力推介各位兔主買呢隻由美國入口嘅乾糧同乾草，原來呢隻係由專家經實驗後研究出最適合兔仔嘅食糧Mazuri，的確好專業，而乾草則由亞熱帶嫩草製成，顏色比市面其他乾草翠綠，兔仔營養好自然身壯力健、長命百歲啦！
兔仔唔可以成日濕水，否則會好易冷親，不過毛毛多嘅兔仔好易積污糟，所以一般兔主人都會買定支兔仔專用嘅乾洗粉，用法好簡單，好似爽身粉咁撒喺兔仔身上，再用梳梳便可，平均一星期乾洗一次便可。
香港居住環境咁擠迫，所以大部分主人都會選擇侏儒兔，因為侏儒兔最大都唔過10吋，比其他兔細一倍，呢款細籠就已經夠用。鐵籠重可自由收摺，方便清洗。而且養兔仔都係要時不時放佢出嚟走動，所以兔籠基本上不需要太大。
想多啲了解小寵物或者飼養心得，不妨親自到位於油麻地現時點商場內的PeteggShop，店主Jester本身是動物癡，佢會定期為不同的寵物搞聚會，舉行吓如賽跑、寵物鬥企得耐或選舉心目中最可愛的動物等活動，讓各位主人可以互相加深對寵物的認識並交流心得。
營業時間：星期一至五6:30pm-9:00pm，星期六、日及公眾假期2:30pm-10:00pm
PeteggShop（23323123）
油麻地彌敦道534-538號現時點商場2樓242號舖
寵物城（26260406）
何文田太平道2號地下及一樓