霆鋒自日前暗示與王菲分手後，台灣消息指半年前有人曾目睹柏芝在台灣的酒吧內坐霆鋒大髀。昨日與一班好友往順利邨球場踢波的霆鋒，直認去年確曾與柏芝在台灣蒲吧。
謝霆鋒與王菲的三角關係，成為近日熱門話題。日前吳大維並親證當年霆鋒曾開出一百萬美金賭局，與衞視一班VJ打賭能成功追求王菲；同時，昨日台灣亦有消息指去年十月，曾有人在台灣華納威秀地下室的Room18酒吧，目睹柏芝旁若無人地坐在霆鋒大髀上。
雖然近日傳聞多多，但昨日霆鋒仍相約梁漢文、李燦森、鄭丹瑞及林海峰等好友，齊往順利邨球場踢波，負責守龍門的霆鋒更表現拼搏，結果亦告勝出。
球賽後，記者問霆鋒有關吳大維承認他曾以百萬美金（約七百八十萬港元）打賭追求王菲一事，霆鋒聽罷木無表情，及後他只說了一句：「正人君子，笑罵由人。」再問他知否王菲曾在後台落淚之說？霆鋒依舊無表情，拒絕回答。
不過，霆鋒與陳冠希前晚曾往跑馬地英皇駿景酒店消遣，其間記者曾問霆鋒有關賭局一事，當時霆鋒細心聆聽後只無奈地苦笑說：「一年前我已經聽過呢件事啦，但我從來冇參與過。」
而對於柏芝在台灣坐霆鋒大髀一事，霆鋒解釋說：「我哋係有去過嗰間酒吧，但嗰日並唔止得我哋兩個人，有大班人喺度，馮德倫都在場。當時因為柏芝飲咗啲酒，又有啲人行嚟行去，佢坐喺我隔籬，我驚啲人撞埋佢度，就用手護住佢，就係咁囉。」
霆鋒並再次強調，四年來他一直視柏芝如妹妹般看待。問他現時是否正與柏芝拍拖，霆鋒即說：「係朋友。」再問他與王菲分手的原因時，霆鋒卻沒有作答。
霆鋒的經理人彭淑霞昨日則在電話中說：「霆鋒有講過佢唔開心，呢排佢壓力幾大，都有要求過放假，但嚟緊佢重要做電影宣傳，又要去台灣做嘢，所以暫時都冇得放，不過霆鋒喺工作上都會好積極嘅。」
此外，謝霆鋒前緋聞女友盧巧音昨午為音樂會綵排，對於近日謝霆鋒、張柏芝及王菲三人的戀情，盧巧音表示之前到蘇梅島工作，故全不知情，並力撐霆鋒是一個義氣仔女。
而張柏芝胞弟張豪龍昨日在牛頭角拍攝新戲《一屋有貪人》，記者欲上前採訪時，張豪龍說：「你想問咩？你問我乜都會答，但係你問我家姐嘅事，我就冇嘢講。」
採訪：朱芷瑩、胡比