機戰終於都登陸PS2，今次以IMPACT為名嘅新系列其實係手提機WonderSwan嘅進化版本，當然在各方面均改良不少，最特別地方係一口氣收錄三集WonderSwan版本，包括《地上激動篇》、《宇宙激震篇》及《銀河決戰篇》三部曲，總話數達到一百大關，遊戲時間超過七十個鐘！
記者、攝影：徐影龍
嗚謝：DreamStore（灣仔188）
由N64版本中首度加入合體攻擊概念，嚟到新作依然存在，不但同系列作品機體，就算「九唔搭八」嘅機體都可合作，例如萬能俠一號攻擊敵人時，密斯特便可透過「援護攻擊」幫手射多槍。同一道理，亦不時會出現「援護防禦」，即係其他機體代為承受攻擊，就算弱小機體都可以有恃無恐咁攻擊敵人。
呢兩個援護系統非常重要，咪以為機體夠強就毋須理會，因為今集首領級敵人同GBA《機戰A》一樣，HP值低過四分一會立即逃走，令你白白睇住強化配件同大量金錢溜走。故必須靈活運用具強大攻擊力嘅合體技及援護攻擊。不過使用援護系統有幾點必須注意，第一係鄰接機體駕駛者要擁有援護技能；第二係地形要一樣，一個喺天一個喺地就冇用；最後係援護機體要具有援護行動力，數值會隨角色等級提升。
除援護系統外，《機戰IMPACT》在各方面改動亦不少。首先係再冇得揀原創主角機使用，主角名字等資料亦不像以往般自由輸入，故事發展完全定好晒，最多係揀選少部分故事枝節，減低玩家投入感。幸好今集攻略關數可有限度自由揀選，例如在《異變編》中可先選完成獸戰機隊，再跳去完成光子力研究所，變相可揀選入隊機體次序，算係畀番少少自由度玩家。
地形變化在今集亦變得非常重要，不但高低差幅度大，而且地圖以全3D顯示，玩家可隨時以右Analog掣，自由旋轉視野角度，免被高山、大廈等建築物阻礙視線，簡化平面式地圖依然健在，不過就取消全體式分布地圖，唔能夠一眼分析各機位置。今集消滅敵人後出現嘅強化部件，需要玩家去「執」，唔似以前咁自動幫你收好，變成機體調動要多一重考慮。
基本上《機戰IMPACT》登場角色同WonderSwan嘅《機戰COMPACT》差不多，除男女主角一模一樣外，當然唔少得高達、三一萬能俠、鐵甲萬能俠、超獸機神等長青機體，而且較少出現嘅機動戰艦、忍者戰士飛影等都會出現，每部機體及駕駛者都有唔同特性，玩家若不想在後期戰事苦戰，便必須充分了解各機體當中優劣地方，再作靈活調配。
‧不要過分英雄主義，行動時應以小隊形式進攻及防守。
‧盡量以相同作品之機體為一小隊。
‧充分利用「援護攻擊」及「援護防禦」。
‧具有「信賴」、「愛」等精神力之角色盡量留待最後才行動。
‧超級系機體應在第一回合便使用一次氣合。
‧改造時真實系機體應着重攻擊力、HP及裝甲上。而超級系則在EN、運動性作重點改造。
記者意見
抵讚：讀碟時間短，玩起上嚟有爽快感。合體技及援護系統大大增加戰術運用嘅重要性。
要彈：畫面完全冇進步，立體地圖睇到眼都花埋。主角機地位變得次要，減少玩家投入感。
機種：PS2
製造商：BANPRESTO
類型：SLG
儲存媒體：DVD
記憶容量：44K
行貨售價：$432（普通版）、$560（特別版）
官方網址：
(c)BANPRESTO2002