身為九四年新加坡小姐冠軍的孫佳君，家人都在新加坡，她說一個人在香港，很多時都會覺得寂寞，軟弱時更經常有返家的念頭。她說：「我比起屋企喺香港嘅娛樂圈女仔當然辛苦好多，身邊冇人支持，乜嘢都要靠自己，但另一方面亦有好處，佢哋唔喺度，就唔需要成日擔心我。好似羅兆輝呢件事，雖然新加坡都有轉載，但佢哋亦冇乜點問我，淨係講咗一句話啲新聞亂寫，佢哋好明白我。
「其實新加坡人思想冇香港人咁保守，香港人思想保守，但娛樂新聞又好開放，好在屋企人平時冇乜留意娛樂新聞，所以唔影響佢哋。𠵱家香港嘅讀者都好精，佢哋睇娛樂新聞就真係當娛樂，唔會好認真。」
問孫佳君可渴望有個男人可依靠，她說依靠就不是愛情：「我性格比較熱情，愛情對我嚟講好緊要，我認為乜嘢事業、搵錢，都係為咗愛自己、愛身邊嘅人而去做，錢呢樣嘢今日有唔代表聽日有，當然愛情亦一樣，今日愛你唔代表聽日唔會愛第二個。我嘅睇法係愛一個人就要去珍惜。至於結婚，相信我十年內一定唔會，結婚係一生一世嘅，結婚嘅話我一定唔會離婚，但愛情唔係為咗結婚，愛情係用嚟享受嘅，愛情到咗某一個地步得到肯定，先至考慮結婚。」
孫佳君明知記者會問羅兆輝，所以她早有準備，一坐低便說：「有關羅兆輝嘅問題，我只會答三條。」雖是事先聲明，但話題兜兜轉轉，又回到原位，她說：「我鍾意做人真啲，一係我就唔答你，否則我會講真話，」當筆者以為可以問深入些，孫佳君說：「夠鐘了。」