發展商開賣新盤一個接一個，八方都湊熱鬧，噚日去到位於尖沙嘴的九龍倉新盤翠濤居示範單位睇樓。見到中原地產喺現場整咗一部「碌卡機」，覺得相當奇怪。八方同中原董事黃偉雄都算一場相識，當然問佢乜事？佢話，呢架機係用嚟作登記用途。佢哋為旗下2400名經紀的員工證內，加入一張智能卡，只要經紀每日4個時段自行前往打卡，每次打卡均有積分紀錄，積分達一定水平，將獲送手提電話等獎賞。佢重話，該公司現於兩個焦點新盤售樓處設立「碌卡機」，旨在鼓勵員工多參與促銷新盤，同提升團隊紀律。八方知道中原地產喺行內素來多創意，呢招都算厲害，毋怪佢哋噚日贏得九龍倉的「翠濤居首輪內購最多成交經紀」名銜。
﹙圖﹚黃偉雄（右）同中原地產副董事王浩聰（左）展示新設的「碌卡機」。
E-mail：