噚日Twins出席喺將軍澳新都城舉行嘅「名人明星慈善大拍賣」，一如以往，Twins所到之處，都迫滿晒人，今次重發生咗段小插曲，一個小朋友迫到撞埋鐵欄，當場痛哭；重有一個癡纏男fans行為怪異，不時大叫：「阿嬌（Gillian），我噚晚發夢見到你呀！」Gillian見佢咁熱情，就惟有講聲：「多謝！」
喺拍賣會入面，有好多世界盃精品。Twins一出現就全場哄動，成個商場嘅人又跳又叫，但係一到拍賣會開始，反應就認真麻麻，最後要Twins以身作則，自己帶頭買埋一份，反應先至好番少少，最後Twins就用五十五蚊買咗一套磁石貼。當日最好成績就係最後拍賣一個木製足球，底價六百蚊，加送Twins親筆簽名，最終以四千五百蚊成交，重由Twins頒獎㖭。
林嘉欣大前日因為疲勞過度、貧血兼壓力過大，出席完一個宣傳活動後不支暈倒，被送入養和醫院，重要暫停兩日嘅宣傳工作，等佢靜心休息。不過林嘉欣噚日已經秘密出院，本來有消息話佢準備噚日朝早十點幾出院，但記者等極都未有人去接佢，後來嘉欣經理人公司話因為佢個樣太疲勞同憔悴，唔想俾記者影相，所以佢自己由後門走咗。
羅霖同林韋辰噚日喺杏花新城，出席商台「親親領袖杏花新城嘉年華」，林韋辰重即席表演玩搖搖技術。
林韋辰話自己玩咗搖搖成十年，識六、七十種花式，佢嚟緊重會同何寶生一齊出隻碟，教小朋友玩搖搖㖭。而羅霖亦話會同個仔一齊玩搖搖，因為親子相處最緊要一齊參與同分享喎。
專送「外賣」嘅排骨亞姐，呢排識咗個內地富豪，本來只係純粹交易，馮仁昭八到佢哋第一次交易嘅銀碼係二十萬。但經過呢次之後，個內地富豪就搵咗呢個亞姐做女朋友，佢哋喺埋一齊已經幾個月，最近重一齊去上海度假。馮仁昭真係唔明，啲男人明知女星係做「生意」，搞搞吓點會當咗係女朋友！
年輕偶像同女友分手後，聽聞佢女友嘅經理人同佢身邊啲朋友就最高興，因為佢哋一直覺得年輕偶像係存心利用女友名氣幫上位。
馮仁昭覺得感情呢樣嘢，外間人好難去評論錯與對，不過咁多女星都俾佢追到手，有時真係要服吓年輕偶像啲追女招數。
做娛樂圈呢行，有啲明星已經搵到錢，但係一樣貪小便宜。
最近有一個電影男星，去咗一對夫婦朋友嘅屋企飲紅酒傾偈，開咗幾支八二年嘅Lafite。
當大家都飲到醉晒，兩夫妻入咗房休息，呢位男星竟然喺人哋嘅酒櫃順手牽羊，攞咗兩支Lafite走人，佢以為人唔知，但其實人個工人乜都睇到晒。