孫佳君入行以來最震撼的新聞，就是被羅兆輝公開兩人脷叠脷、及和兩位外籍男女在遊艇上互摸、坐大髀的親熱照。縱使其他人指手畫腳，但在孫佳君本人看來，只是普通不過的生活照，日後亦照影可也。
兆輝失常向周刊大爆富豪和圈中女星性史，其中最大的受害者，非他的前度女友孫佳君莫屬，除了她和羅兆輝的脷叠脷親熱照被公開外，更加有她在遊艇上坐在洋漢大腿、一邊和另一位外籍女子互摸的相片，嚴重影響她在觀眾心目中的形象。發生這樣的事，換了其他人，可能已在娛樂圈中銷聲匿迹，但孫佳君卻仍然勇於面對傳媒，輕描淡寫將事件帶過，反而變成提問的人少見多怪，未見過大場面。
提起意識大膽的親熱照，孫佳君處之泰然，她說：「我諗都諗唔到，啲陳年舊相會俾人公開，而且哄動全港。嗰啲只不過係生活照，又唔係偷拍，影嘅時候我知㗎，全部都係望住鏡頭嘅，如果我係普通人，就冇呢個價值去登，做藝人冇私隱呢樣嘢我好清楚，所以我冇唔開心，我亦唔會放棄喺娛樂圈發展，因為我非常鍾意拍戲，呢個係我自己選擇嘅生活方式。當然件事發生咗，唔舒服都有少少。
「我唔會因為呢件事而唔影相，生活照會繼續影，呢啲係生活經歷，係紀念，係memory。可能我個人比較開朗，唔會去記住呢啲事，我冇為呢件事喊過，一定冇，反而我睇到一啲令我感動嘅戲嗰陣會喊，好似《有你終生美麗》咁，結尾嘅時候我就有喊。」
孫佳君續說：「我亦唔會因為呢件事而對人有戒心，我唔會鎖住自己嘅心，我仍然願意信任人，仍然相信呢個世界上大部分嘅人係好人。」
對於羅兆輝，孫佳君仍然當他是好朋友，並說會和對方食飯，她說：「上星期我有同羅兆輝通過電話，重約咗下次得閒一齊食飯，等冇咁多記者先。我不嬲都唔覺得佢有問題。其實佢已經道咗歉，大家都應該畀個機會佢，無論佢變成點，佢永遠都係我嘅好朋友。
「我知道呢件事，對我嘅形象梗係會有影響，但唔發生都發生咗，都冇辦法。呢排我開始練瑜伽，令到心境祥和啲。有好多朋友打電話慰問我、關心我，呢個時候我一定要堅強，嗰啲只係生活照，朋友都唔係好大反應。陳加玲呢排成日陪住我，而且重幫我諗點樣回答記者嘅問題，另外何超儀都對我好好，我好多謝佢哋。外面嘅人點睇呢件事我唔知，因為我都好少出街，冇乜機會撞到人，所以亦冇機會畀人對住我講一啲難聽嘅說話。」
日前孫佳君由新加坡返港，身邊有一位年輕男子，有傳是她的新男友，對此孫佳君大叫救命說：「嗰個係我嘅司機嚟咋！如果真係男朋友，都唔敢同我一齊行啦，尤其係呢個moment，我真係好無奈，公司嘅男同事都怕咗我，唔敢同我一齊出街，費事俾人誤會，咁落去連我嘅司機都唔夠『薑』去接我機，我要一個人坐機鐵都似。如果我拍拖，我會第一時間公開。」
她之前和羅兆輝拍拖，起初都沒有公開，她說：「就係因為之前冇，所以學識以後要公開，當然會係感情穩定先公開啦，否則我約第二個出街，咁咪話我成日轉男友。我諗件事唔會嚇倒啲男人唔敢追我嘅，如果真係鍾意我，會繼續鍾意。」
採訪：張止寒 攝影：陳志嵐