時裝總是跟隨季節而轉變，童裝潮流亦然，一到春天陽光燦爛、花草盛放的時候，正代表新一季童裝隆重登場。要數今季童裝服飾新趨勢，不如從鞋講起，春季的女童鞋一向以色彩鮮豔見稱，今年更加上各式各樣的立體裝飾作配襯，強調小朋友富動感同活力的一面。
記者：許穗齡 攝影：陳穎
Model：欣欣 鳴謝：ABEBI提供服裝
講到春天氣息，就必數呢對木屣。黃色皮帶上配上鮮豔小黃花，着上腳效果出奇地討好，小朋友行走時花花更會隨風飄動，夠晒動感。木屣底部加上一層有坑紋的硬膠，唔怕小朋友會跣親。
春夏天係菊花盛開的季節，難怪應季衣飾也多以菊花做襯托。呢款人字拖，就以藍色、白色嘅藤織成，配搭清新自然，再加上一朵皮製小菊花，更加討人喜愛，而且鞋以藍色軟皮做底，着上腳都幾舒服！
今年芭蕾舞鞋大熱，連絲帶也成潮流靚鞋的必定配件之一，好似呢款牛仔布鞋，就配有白色絲帶，而鞋邊的立體小膠花，重可以手轉動，啱晒手多多嘅小朋友。除絲帶縛繩外，重附有普通棉質鞋帶。
小朋友天真活潑，着得誇張點都會令人覺得怪相，好似呢款以布花和假小果實作裝飾的木屣，小記就覺得佢充滿夏日動感，睇到都覺得心情開朗。木屣底部亦加上一層有坑紋的硬膠，就算小朋友跳跳紮都無咁易跣親。
加珠片唔一定係登台服裝專用，好似呢款童裝鞋，以粉紅色令身膠面為主，鞋面位置加上一隻立體蝴蝶，以實色珠仔勾出外形，再填上不同顏色的珠片，效果既搶眼又Cutie，襯短裙仔就最適合。
左右腳鞋面圖案不同的設計，是年輕人便服鞋品牌Camper的賣點，呢款反傳統的設計今季更流入童裝界。呢款以杏色真皮製的拖鞋形戶外鞋，就以左右不同的凸出香蕉圖案作襯托，一邊開皮一邊完整，都幾搞笑。鞋皮質地軟熟，着上腳好舒服，不過由於色澤較淺，恐怕好易污糟。
春天來臨亦同時代表雨季的開始，係時候幫小朋友買番對雨靴，呢款以100%天然橡膠製成，質地舒服，靴面更印滿立體的數目字，坐低休息時又可乘機教小朋友識字。靴頂後方更設有小圈，方便將靴掛起晾乾水，設計都算幾有心思。
牛仔布易襯又好睇，難怪今季不少鞋都用牛仔布製，呢款拖鞋形便服鞋就係一個好例子，不同嘅係佢喺鞋面加咗一朵透明膠製、用紅色線綑邊的花仔，簡單得嚟又幾可愛。着無包踭嘅鞋最忌過鬆，因為好易行行吓成隻飛走，唔小心失足就弊，所以呢款鞋附送埋鞋墊，唔使家長另外出去配。
MYSHOP（28948676）
銅鑼灣恩平道2-38號嘉蘭中心1樓126號舖
ABEBI（28821809）
銅鑼灣恩平道2-38號嘉蘭中心1樓112至115號舖