上個禮拜四晚，有個正喺青島度緊假嘅朋友報料，話見到中建（138）麥老闆同御泰陳老闆喺青島出現，由於天色已晚，睇唔清其他同行人士，不過若果將麥老闆、陳老闆同青島拉埋一齊嚟講嘅話，係人都即刻會諗到同海爾有關，加埋今年年頭話海爾正申請緊將國內流動電話業務注入海爾中建（1169），唔通今次嘅申請搞掂咗要做埋啲手尾？今鋪注資對海爾中建嚟講非常重要，可以增強海爾中建嘅實力。市場上好多投資者都試過喺中建系損手，若今次換咗海爾做揸fit人，相信投資者反應會好好多。
市場上一啲行家亦收到風話有班大戶密密咁收貨，唔知係唔係為咗配合海爾公布注資大計，準備做一場大show？平心而論，海爾入主對1169嘅股東絕對係好事，因為淨係海爾個名已經可以吸引到國內嘅資金慕名而來。
幾經辛苦終於捱過咗艱難期嘅華德豐（297），喺今個月20日急跌落0.425元後就停咗牌，一直沉寂咗個多禮拜，突然喺上個禮拜尾又傳出話要批股嘅消息。今次之所以要批股，聽講又係話要收購飛天朱手上「香港衛星」嘅股權，不過呢次批股嘅作價就有兩個版本，有人話會以5毫半批股，又有人話會用6毫半批，兩個嘅溢價都有3成樓上，不過兩個版本嘅目標價都係話喺7毫樓上。
點解有咁大溢價班新投資者都肯磅水？聽知情人士話，呢次批股係想將華德豐完全轉型為衞星服務公司，唔要再拖拖拉拉，更有人重提舊年中美軍機事件後，中國官方發覺全球定位系統畀美國佬控制住會有好大問題，話一定要搞好自己星系統，重話今次明益華德豐係合乎國