現時，若車主要購買汽車保險的話，可以經汽車代理或自行透過保險經紀購買；但近年部分汽車嘅意外率及失竊率大幅上升，除令呢類被列入高危車款及投保人士嘅汽車保費同時上升外，就連一啲家庭車及「循規蹈矩」嘅駕駛人士亦受到影響。有見及此，我哋就特別請來兩位汽車界嘅專業人士，為大家講解一下關於購買汽車保險嘅注意事項，以求可以用較低嘅價錢，購買到適合自己的汽車保險。
文、部分攝影：黃凱穎
要避開昂貴嘅汽車保費，最簡單方法係購買汽車代理嘅車款；因為各大汽車代理每月嘅銷量，都會到達某一個數目，故此經佢哋購買汽車保險，會較自行購買來得便宜同可靠。
據皇冠汽車市場推廣部總經理張錦興指出，雖然現時汽車保費較前有所提升，但代理喺銷量同車種方面都有不少利好因素，所以並無太大影響，車主所繳交嘅保費仍與先前相近。同時張先生又提醒車主，買新車時可透過汽車代理購買汽車保險；因為由代理所出售嘅車款，好少會有拒保嘅情況出現，所以喺一般情況下經由汽車代理所出嘅保險都會較為便宜。
有時，部分車主會買到一啲特平汽車保險，如果係的話就要注意保單內容，例如投保車輛嘅投保額、意外後索償嘅墊底費同賠償條件等等；特別要注意意外後索償嘅墊底費，因為當車主向保險公司索償時，車主要根據合約支付最低嘅費用，而餘數則由保險公司負責，所以部分特平保險嘅墊底費會頗高，大家喺購買時要特別留意。
另外，要注意係索償後嘅NCB（無索償折扣）問題；假如投保人並無任何索償紀錄，每年續保時便可享有保費折扣，第一年由20%起，現時每位車主喺購買汽車保險時，最高能享有60%嘅NCB。但若投保人中途提出索償，NCB會隨之遞減或取消。張錦興先生以豐田汽車為例，若新車主經由豐田保險購買私家車綜合保險（全保），如索償不超過兩次的話，係可以保留原有NCB嘅折扣。
而有部分保險公司為爭取客人信心，都會喺合約條款提供特別嘅額外優惠；但張錦興先生強調呢類優惠並唔係金錢上嘅折扣，而係於意外發生後對車主提供更佳嘅保障。張先生表示佢哋會為車主，提供擋風玻璃無上限賠償而不影響NCB折扣、修理費不超過$10,000時毋須等候公證行批准、首年內遇上全損（TotalLoss）可賠償全新同類車輛等等。另外，張先生亦提醒車主除要留意保單價錢外，最好留意埋保單內有無其他增值服務，如24小時緊急支援、拖車及免費索償諮詢等，以求為自己提供最好嘅保障。
羅少雄指出，車主如要自行購買保險，其實可透過經紀顧問代為問價；因為佢哋熟悉汽車保險嘅有關事宜，部分更係專責水貨車或高危車種，所得嘅價錢一般都會較為便宜。而羅先生又指出，香港共有約86間保險公司有提供汽車投保服務，而經保險監理處認可嘅經紀顧問有399間；而喺呢86間保險公司當中，有部分係與外資合營，故此保費可能會略低。
另外，如果車主本身已有使用其他保險項目的話，不妨聯絡自己嘅保險公司，睇睇加購一份汽車保險，保費會否較其他保險公司為低。羅先生又指出，如果係公司或團體須購買汽車保險的話，大可以團體名義投保，價錢及條款或會較一般個人投保來得更佳。
除行貨之外，有好多車主都會選擇購買水貨車，若然如此的話就要自行購買汽車保險；由於以個人名義向保險公司購買的話，保費可能會較高。
故此，有部分汽車商有意引入一套外國嘅汽車保險制度，無論車主有多少部車，都只需購買一份保險便可。據香港右軚汽車商會會長羅少雄表示，呢套制度喺英國、美國及澳洲等國家非常流行，保險公司會因應投保人年齡、經驗及意外紀錄等資料，去評定保費多少；而呢套汽車保險制度主要針對個人嘅駕駛方法，與投保車輛無關。而佢哋亦經已向保險業協會提出有關建議，相信喺不久將來便可實行。
當遇到交通意外後，除可先致電保險經紀外，並須記下對方嘅姓名、電話及車牌號碼，有需要的話更應拍下照片作紀錄，然後連同索償表格交予保險公司，保險公司便會委託車行報價維修，喺雙方同意下才會作出賠償。如果順利的話，大約兩星期內便可完成整個索償手續，但大家要留意一點，就係當車主收到任何法庭傳票，或對方車主索償文件，均須交予保險公司，否則會延誤索償程序甚至拒絕受理㗎。
註：
1.以上保費嘅投保人年齡必須為25歲或以上，並持有駕駛執照兩年或以上；如投保人之職業被列入高危職業的話，則須簽署一份聲明書，以表明唔會喺工作期間使用所投保之車輛。
2.以上保費只供參考，一切資料以有關保險公司之最後公布為準。