好幾位傳媒老總、名筆都喺不同時間應邀到大學嘅新聞系做客座講師開科授徒，向佢哋啲後輩或者師弟妹傳授新聞實戰經驗。新聞系呢類科目，唔係下下都要由博士教書嘅，讀完啲博士（通常未做過記者編輯）傳播學理論，要修讀一啲實踐課程，先至夠完備。
學生係唔係咁諗就唔知，今日嘅大學生思想，同以前好唔同，老人家摸唔清。老總R坐埋枱食飯，口水特別多，佢話今日嘅大學教師質素，比以前高出何止一皮，佢自己上「新聞採訪」第一課，老師講記者裝備已經講咗兩小時，就係教佢哋買指南針，以備入咗森林採訪，唔會迷途！
老總R亦有到大學客串，教咗一個學期，唔肯再去。理由好簡單，見到啲學生冇心機上堂，佢亦冇心機去教。有一次，兩位學生，一男一女遲到，遲咗成三十分鐘。老總R問佢哋點解咁遲，女仔醜醜地咁指住男仔：「佢冇叫我起身囉。」男學生就笑笑口咁對住女仔講：「你冇叫我起身呀。」老總R向佢哋上下打量，估到係乜嘢一回事，費事嘥氣咯，只係問清楚佢哋叫做乜嘢名，唔係扣分，只係心中記住，返到公司，就叫秘書寫低啫，以後見到呢兩位嚟申請記者職位，識得點做！其他同枱食飯嘅老總即刻問老總R攞名，老總R話：「此乃私隱，不宜透露。」