連續三日的復活節假期，大人當然希望可以好好利用空檔休息番吓，相反小朋友已經晨早密謀點樣大玩特玩，更有餐廳已預備好一連串慶祝節目，既有自助餐任你食，又有各種遊戲任你玩，再請你睇卡通片，讓一家大細可以一次過盡情吃喝玩樂，玩盡復活節假期。
記者：黃婉冰 攝影：林栢鈞
Imageboy&girl：Jason、Javier、Jillian及Simpson
冷盤除了各款煙魚肉、壽司外，另有這款比凱撒沙律較豐富的鮮魷沙律，魷魚圈先用雜菜、白酒、香草灼熟，讓香草味與鮮味混為一體兼踢走腥味，適量的甜椒、沙律菜、番芫荽、橄欖油、蒜茸、檸檬汁、刁草在旁協力，將鮮味提升，簡單清怡為主。
試味報告：煙韌魷魚清甜中帶有獨特的刁草香味，魷魚味與刁草清香一拍即合，甜椒爽甜有蒜香，味道清新，夠開胃。
有細路仔的地方必定有它的出現──炸魚薯條。沿用英式傳統做法，用無骨肉滑的龍脷魚柳，蘸滿一身弗打脆漿，脆漿內加入番芫荽點綴，外表炸得脹卜卜，金黃香脆，加上酸味味的沙律醬、茄汁，足以令各人愛不釋「口」。
試味報告：炸魚最值得一讚的是外層脆漿，咬落鬆脆無食麵粉的感覺，魚肉嫩滑味鮮，味道正宗，蘸上沙律醬食，更添滋味。
難得放假，不妨開開心心放肆一天，盡情食雪糕。每日都有三款不同口味的Movenpick雪糕及雪葩，放在雪櫃內任你「畢」，芒果、士多啤梨、呍呢拿，必有一款啱你口味。
試味報告：芒果雪葩味道較重鮮果香味，亦無雪糕般甜，以果味為主。
「食物會盡量做啲少骨嘅菜式，好似炸魚柳、雪糕都係小朋友最鍾意食嘅，有得玩又有得食，大人細路都同樣開心。」
店名：Madison'sRestaurant&Bar
電話：25234772
地址：金鐘金鐘道88號太古廣場3樓349號舖
備註：每位奉送Movenpick雪糕一杯及即日下午2時20分「小飛俠」UA戲院戲票一張
座位：104個
營業時間：星期一至日中午12時至午夜12時
付款方法：現金及信用卡(Visa,Master,AE,Diners)
供應時間：3月30及31日中午12時至下午2時半
收費：成人每位$180，12歲以下小童每位$120。
將雞中翼拆去其中一條骨，再將雞肉翻起，做到外形好似雞髀仔一樣，用豉油、白酒、雞粉、黑白芝麻醃至入味，先燒香，再蘸粉炸，令雞皮香脆之餘又可以保留肉汁，最後撒上黑、白芝麻，再多一重芝麻香。
試味報告：雞翼起晒骨非常易食，雞肉皮香脆，肉嫩滑，味道濃得惹味，一啖一件，方便小朋友自己食。
羊扒已不知不覺成為自助餐中的常備菜式之一，只是做法與味道有所不同。大大件的羊扒來自新西蘭，醃料有香草露絲瑪利、香葉、蒜茸、酒，香葉味慢慢滲透羊肉，煎香再補上露絲瑪利汁，確保夠味。
試味報告：羊扒未食已聞到陣陣肉香，肉味濃，生熟程度剛好，煎過後肉汁依然豐富，肉質軟熟。
白雪雪忌廉汁由牛奶、少許椰汁、刁草、香葉煮成，味清香，與各款新鮮海鮮最夾得來，中蝦、石斑柳、青口、魷魚，忌廉汁令海鮮入口更滑，碟邊唧滿薯茸，與忌廉汁襯到絕。
試味報告：忌廉汁做得沒有西式般濃稠，入口較滑且有椰汁味，奶味亦幾重，好在與海鮮的味道互不干擾，味道分明。
店名：豐味閣
電話：26202909
地址：九龍灣展貿徑1號國際展貿中心3樓
座位：200個
營業時間：上午11時半至下午3時，晚上6時半至10時半。
供應時間：即日起至4月1日上午11時半至下午3時
收費：成人每位$98，小童每位$68（任飲橙汁、菠蘿汁、咖啡或茶）。
備註：另有填色比賽及每位小朋友可獲贈顏色筆一盒。德福花園設有免費穿梭巴士往返及提供2小時免費泊車。