仕途失意、情場得意；正財被cut，要諗橫財。剛剛「主動」減人工一成、減花紅四成嘅金管局總裁任志剛，噚日與嬌妻一齊去馬場探佢隻新馬──「有錢賺」。呢隻兩歲愛爾蘭馬，係任總同佢堂大佬任錦光一齊養嘅，只出戰過一次，冷門落敗。今日再出跑千二，只要佢生生性性，減多百零萬人工又點話？
今次減薪之後，任總嘅年薪大約得八百萬，雖然都唔少，但公營機構「人工第一高」嘅「榮譽」，已經讓咗畀香港交易所嘅鄺其志總裁，睇怕日後會少啲批評。任總呢招都算高，但其他公營頭頭就真係多得佢唔少；不過，論高招，邊個都唔夠阿松高，各位超級公僕，任總就係樣辦，大家識做啦。
E-mail：