日本影壇奇葩淺野忠信，前日抵港為電影《殺手阿一》宣傳，並出席昨晚香港國際電影節的午夜場首映禮。昨晨他接受本報記者訪問，除了談電影外，更大談其溫馨的家庭生活。
淺野忠信在《殺手阿一》中飾演變態黑道人物垣原，現實的他不但沒有角色的躁狂，更斯文中帶點害羞，他說：「其實我唔鍾意暴力，拍呢部片時，我正尋找要演出嘅原因。雖然導演好鍾意內臟（電影共用了三隻牛的血和內臟），但係佢處理嘅暴力題材好唔同，就算每個人對呢部電影嘅睇法好唔同，我覺得電影拍出原著嘅黑色幽默感同一份屬於男與男之間嘅傾慕、超越性別同肉體嘅愛情，係片中存在嘅浪漫之處。」
自言片未開拍之前已每星期追看原著漫畫的淺野，對垣原的角色由怕變愛，他說：「最初接劇本時最驚要拍切斷自己條脷嗰場戲，好難忘呢個角色，因為自己從未染到成頭金色去演出。自己亦視垣原呢個角色係一個好另類嘅英雄。」他更盛讚拍檔孫佳君容易溝通和樂於用日語跟他交談。
雖然《殺》片在港、日兩地均被列為十八歲以下觀眾不能入場的電影，但淺野不會阻止六歲大的女兒和歲幾的兒子觀看此片，他認真地說：「我覺得套片反而啱小朋友同女性睇，有好多嘢愈係唔畀睇就會愈令人想偷偷地去睇，睇完呱呱叫一輪就冇嘢㗎喇。」
拍過多部被視作高質影片的淺野，提起岩井俊二九五年執導的《夢旅人》時便露出甜在心頭的表情，他不似其他日本藝人只談工作不談私人事，甜絲絲地說：「呢部戲令我認識Chara（他的歌手妻子）。而現時我覺得家庭最重要，夾band同畫畫都係自己最大嘅娛樂，電影就似乎排到最尾。」
採訪、攝影：張一明