呢個復活節假阿董會同董太返大陸遊山玩水，到星期日先返香港。八方未免聯想到前日有消息傳出，話阿董接到有啲聲稱爭取居港權人士嘅恐嚇信，話會對佢不利。
雖然未知係真定假，不過阿董呢一着真係好棋，常言道「最危險嘅地方就最安全」。橫掂班爭取居港權人士呢排最唔想去嘅地方就係大陸，阿董一於叫煲呔喺香港頂住個署理特首位，自己就返去偉大祖國懷抱，由北大人照住，玩都玩得零舍安心。重趕得切四月一日遣返日之前返港坐鎮。
不過阿董都未必可以盡情玩樂，皆因佢重要最後衝刺，諗掂埋個部長制，唔通返到內地會特別好靈感諗橋？
E-mail：