不經不覺，幾日復活節長假期經已到臨，若然你無打算出去外遊的話，留港休息亦記住唔好揸快車噃！事關警方交通部，正準備添置新車作巡邏捉快車之用，而近期作第2階段測試，其中佢哋就向奧迪代理，商借一部銀灰色嘅四門A6，由兩名外籍督察級警務人員，響新界南區作反非法賽車，以及違法快車嘅隱形戰車之用。
咪以為呢部A6只係一般貨色，據亞Mark最近打聽得知，話原來佢係一部有250匹輸出嘅2.7公升Bi-turbo型號，加上Quattro恒式四驅系統，跑起上嚟你都未必係佢對手㗎！想唔到近年奧迪唔止受一眾名人明星追捧，就連香港警務處嘅高層亦打佢注意。聽講話呢部A6，有好大機會成為新一款隱形戰車，而同期測試嘅車款重有寶馬530iA同富家S60T5㗎！但睇嚟中標嘅機會就唔係咁高喇！