松霞配轟動中港，中環賓架無不以此為話題，呢日午飯時刻，馬主H猛咁講馬，哭馬喪之際，公子L大喝一聲：「講馬好悶啫，講吓阿松有乜料重過癮啦。」眾人齊聲和應，馬主H唯有收聲。賓架陳話阿松哥三位紅顏知己中（以曹仁超星期一投資者日記為權威source），佢識得蘇菲，事關蘇菲當年在摩根銀行做工，阿松在萬國寶通（現稱花旗，JP摩根亦被大通收購，合併成為摩根大通），大家已經識得。蘇菲被選往紐約受訓，小小officer已經可以坐商務客位，賓架陳在另一間美資銀行工作，去紐約受訓就坐經濟客位，摩根的確寧捨闊佬，令賓架陳留下深刻印象，亦因此特別記得蘇菲嘅甜蜜笑臉。
波王L就識得曹仁超筆下嘅馮婦嘅先生。即係F先生啦，大家都喺銀行界工作，向佢哋致以最良好嘅願望。
波王L位老友A係高球發燒友，睇完《蘋果》星期日之大版伏明霞報道後，向波王L報料：「喂，上星期六松哥被記者包圍之時，我見到伏明霞喺深圳打波喎，我最初以為佢好面熟，但記唔起佢係邊個，睇完《蘋果》先至醒起。」霞妹近來好打高爾夫，與松哥溝通得好好，老友A又記得松哥帶過一個貌似霞妹嘅年輕女子到石澳打波，以前唔知做乜，𠵱家就好明白啦。松霞拍拖培養感情，可能就在高爾夫球場上，一來清靜，二來球場內能避記者耳目，以後可能有賓架學嘢，帶美少女去打波㗎。