港股噚日再升45點，收報11032，成交62億元，不過期指就開始轉低水。日本取消銀行存保制，外滙界人士預期可能有資金由日本流出，會唔會流到入港股就好難講，不過只要有資金流到東南亞，香港都應該受惠，但若果資金外流令日圓下挫，郁到人民幣嘅時候，都咪話唔麻煩。另外，中國入世後，企業紛紛裁員增加競爭力，但同時大家又高薪鬥搶人才，將令國內兩極化問題日趨嚴重，鬼佬對此就更加充滿戒心，不利港股後市。
光通信（603）有隻認股證607將於4月27日到期，行使價都幾高，達0.36元，以正股噚日收市價0.079元計，若果股價唔係幾倍咁升，都幾難有人行使，不過咁，行使價是可以調整嘅。雖然光通信近期不斷有大沽盤掛出，但國泰君安一直托住，股價由0.06元抽高至0.08元以上，似乎有事會發生。光通信噚日被掟低6%至0.079元，國泰君安在0.078元買盤強勁，比沽盤大好多倍。黑客話，在認股證行使日未屆滿前都可能會有人托價，不過臨近下月底就要小心。
新海能源（342）噚日再度傳出有中資入股（通常莊家想人跟玩就一定會作是中資入股），成交大增至3005萬元，但只上升3.7%，似乎幕後人士在製造大成交多於要進一步炒上。此股由0.05－0.06元水平炒上，都係時候搵人接貨。齊翔食品（735）股權易手不久即配售2.8億股新股，每股0.1元，集資2800萬元，復牌股價急升11.7%，收報0.124元。Cookie話呢手貨畀晒自己友，街外無貨，當然可以任佢升啦。