PS2隻《機戰Impact》正如鐵人上星期所講，真係星期二提早派貨，但由於行貨限定版來貨比較少，所以一開賣就馬上被炒上七百幾，而普通版亦賣到$480左右，不過都一樣有價有市。據知呢幾日《機戰Impact》隻預訂特典DVD都會到Game場，好多舖頭𠵱家都做緊預訂服務，索價$150左右，好多Game迷都驚住再被炒起，所以個個都爭住落訂，相信去貨都會甚快。
另外，PS2版《鐵拳4》同《KingDomHearts》今個星期都到咗貨，前者賣$350左右，跟Game有Poster送，一定要記得攞，後者開價$420左右，定價算是一般。至於好多人期待已久嘅《灣岸賽車》，相信亦會在今日到貨，有興趣嘅不妨落Game場望吓。咁多大Game而又撞正復活節長假，相信呢批新Game嘅售價都會企硬，想買到平嘢，只好行多幾間去格價。
今個星期GBA嗰邊都有重頭大作推出，鐵人所講嘅就係《封印之劍》同《ShinningSoul》。首先係《封印之劍》方面，直至截稿前，隻Game都重未喺香港見街，不過收到風話日本方面限定版叫緊11,000日圓左右，相信嚟到香港Game場之後，起碼要賣成$800；至於《ShinningSoul》方面，估計行貨售價為$320，不過貨源方面好似話幾緊張，唔知係咪香港代理怕咗啲老翻，所以入咁少貨呢？
GC上個星期就威晒，不過PS2今個星期咁多勁Game出，所以都要逼住讓一讓路，GC嘅機價（$1,550）同《BioHazard》（$350）都作出輕微下調；至於XBOX方面，現貨機價大約$1,980左右，都叫做抵買。
文：打機鐵人