長假前夕，港股維持反彈之勢，恒指收報11032，升45點，成交62億不算太冷清。恒指暫時仍受制於10日線（11003）、20日線（11034）和上次雙底頸線11108，若能以大成交突破，調整幾可肯定結束，可以買貨，否則，可待回落到10700水平才買第1注。
無論大市向上突破還是向下調整300點，趙飛雲都會按照策略買藍籌股及其窩輪，因此𠵱家就要揀定目標。今次對準嘅第1目標係和黃（013），和黃業績比預期好，唯一令人唔放心嘅係3G業務，不過隻股由1月初高位79.5元跌落嚟，應已反映得七七八八。
睇走勢，和黃亦好有機會開展新升浪。和黃噚日平收68.75元，暫受制於50日平均線（69.275元），但9RSI已率先突破降軌，MACD向上挑戰0線，顯示動力正加強。由2月初至今，和黃走勢似營造頭肩底，頸線在71元左右，亦即100日線所在，相信下月初可破（點解？因為到時基金應已索晒盈富批貨），量度升幅目標為78元。
趙飛雲乃小散戶，和黃正股唔買得幾多，想贏多啲就要炒和黃Call輪，對象係9110，貪佢溢價唔貴槓桿大，成交又夠。