寶詠琴日前接受某周刊訪問，狂數前夫劉鑾雄（大劉），重話大劉要將佢每月十萬蚊嘅贍養費減到五萬。馮仁昭就覺得好奇怪，大劉一向出名疏爽，點會孤寒到連區區幾萬銀都去計較？
於是馮仁超四出八吓呢單嘢，原來寶詠琴九二年同大劉離婚嗰陣，已經收咗一大筆贍養費，所以大劉根本唔需要再每個月畀贍養費，而嗰十萬蚊，原來係白建時道十二號嗰間豪宅嘅雜費，另外用嚟畀賓妹買雜物用嘅，而且用剩啲錢應該要畀番大劉。
至於話大劉將寶詠琴入院嘅事放料畀傳媒，馮仁昭亦知道唔係事實，寶詠琴入院嗰日，本報第一時間收到料去做，但消息來源肯定直接同間接都與大劉冇關，擺到明係有人屈佢。
關之琳（之之）早排接受商台節目《茶煲裏的查篤撑》嘅訪問，而節目就喺噚日播出。喺訪問入面，之之大方談及佢同男友黃家諾嘅戀情，問到之之戀情公開後有冇壓力，佢就話：「我就冇，但係唔知佢有冇，不過佢就冇諗過我哋嘅戀情公開咗之後有咁大反應（指傳媒），佢真係呆咗幾日，開頭有少少接受唔到。」
問之之佢哋點樣由朋友發展到情侶，佢就話：「佢係我朋友介紹識嘅，佢可能係欣賞我，所以咪追我囉！」
周汶錡噚日去咗中環新城電台接受施念慈訪問，佢大談同男友杜德偉嘅感情，佢話佢同男友平均一星期見面一次，佢兩個最鍾意一齊曬太陽、行街同食嘢。周汶錡話佢同杜德偉好鬼夾，但𠵱家就唔急住結婚，除非想生BB，但如果結婚話，
古天樂嘅媽咪養咗隻雪橇犬叫做阿Lo，聽講古媽媽重好鬼死錫隻狗，間中會約埋附近愛狗嘅街坊，帶埋愛犬阿Lo搞聚會，早幾日古仔個媽咪重因為要搞狗仔聚會，所以唔得閒煮飯，搞到古仔屋企嗰日冇飯開，最後古仔惟有買外賣畀佢阿爸食。估唔到做古仔屋企隻狗又真係幾幸福。
第十三屆台灣金曲獎入圍名單噚日公布咗，香港有份角逐獎項嘅歌手只有蘇永康、陳奕迅同林憶蓮，康仔係第二年入圍「最佳國語男演唱人獎」，同陳奕迅、周杰倫、王力宏、伍思凱、庾澄慶一較高下，而「女演唱人獎」入圍嘅就係林憶蓮、張惠妹、孫燕姿、辛曉琪同蔡健雅等。
齊芷瑤同趙薇前男友葉茂青行得好埋，有人曾經見過佢兩個一齊喺香港食肆出現，聽講葉茂青都幾主動約會齊芷瑤，其實以芷瑤條件、學歷都唔錯，佢媽咪對芷瑤嘅戀情都幾緊張，好似年前芷瑤同某靚仔小生拍拖，因為嗰個靚仔小生用情不專，兩個人終於咪分手收場。
何韻詩噚日同蕭亞軒、陳司翰出席屯門市廣場舉行嘅《Teens校園活動》，對於近排有傳話EMI因為要同王菲續約而作出裁員行動，何韻詩就話：「經濟大氣候（指裁員）嚟嘅，無辦法啦。」佢重話：「公司𠵱家都係咁上下人手，暫時我未感覺到有乜影響。」
喺張柏芝同霆鋒來往咁頻密之前，原來柏芝同陳小春曾經喺上年十一月已經行得好埋，之不過柏芝一向當霆鋒好似係偶像咁，所以佢兩個走埋一齊都唔奇。而早幾晚馮仁昭就喺銅鑼灣見到陳小春，佢個樣不知幾風騷，完全唔似失戀，睇嚟佢同張柏芝已成過去式。