在香港開茶餐廳動輒都要六、七十萬元，但在大陸開一間茶餐廳，投資金額可能是香港的一半，而且因為口味新，價錢平，能吸引不少內地食客。若加上地點旺人流多，分分鐘可令食客大排長龍。係咪已經心郁郁想去大陸開番間茶餐廳做老闆？或者先參考吓曾翰文點樣以不足三十萬資本在祈福夢想成真啦！
記者：曾順珍 攝影：黃子偉
今年五十歲的曾翰文，跟太太在番禺開港式茶餐廳已有三年，回想起當時年近五十才入行做初哥，他亦不期然笑笑口謂，自己原本是個公務員，因為哮喘問題而被迫提早退休，還搬上內陸居住，以便調養身體。
「你知啦，五十歲人重好後生嘛，唔做嘢會好悶㗎。而且我自己又好鍾意食嘢，見到呢度（祈福商場）有商機，於是就決定喺呢度開番間舖頭囉。」
最初，曾翰文是想加盟一間連鎖葡撻店，後來因為這間葡撻店突然關門，於是他惟有轉開茶餐廳。
「做茶餐廳的好處是可以聚集一班老友，而且我太太每日都要飲奶茶咖啡，如果搬上番禺居住，無得再飲就會好唔舒服。加上我哋見到呢度人流真係好多，特別喺假日，好多香港人會上嚟度假，而附近連一間茶餐廳都無，所以我哋就決定喺呢度開舖。」
因為是初哥，曾翰文根本連沖奶茶咖啡都唔識，於是便找個做食肆行業的朋友教路，另外他自己又去學整麵包，總之跟食有關的他都去學。
「呢度嘅人根本未食過西多士，飲奶茶就只係用茶包沖，所以如果請內地員工，我就要親自教佢哋，於是我惟有要學識晒所有做法先。」
起初，內地人還未能接受港式茶餐廳的口味，做的多是港客生意，但漸漸地，他們開始覺得新鮮，慢慢的也接受了。
「內地人好興講價，連飲杯奶茶都要你畀折頭，於是我哋惟有解釋做飲食係無折頭嘅，而佢哋亦算明白事理。𠵱家我啲客人有一半係內地客，有一半係港客。」
為了要貫徹港式茶餐廳的風格，所有食物和調味料都是沿用香港茶餐廳所選用的，如嘉頓麵包、公仔麵、煉奶、糖漿、咖喱、沙嗲、檸檬、咖啡……還有具香港特色的車仔麵。
「喺香港，就算我唔識都可以知道去邊度攞貨，但喺呢度，就算我行勻成個廣州、深圳，都搵唔到所需要嘅用具。因為當我想喺內地入貨時，先知道原來內地嘅午餐肉跟香港嘅唔同，同一個內地嘅牌子，出口香港嘅原來好食好多，於是我哋惟有向香港攞貨。
「重有內地嘅爐具跟香港又唔同，好似嗰啲沖奶茶嘅茶罉、茶袋，內地係無嘅，連碎冰機都好難搵，於是我惟有要落香港買貨，之後如果要換新嘅，我就叫內地嘅爐具廠照住嚟造。」
曾翰文話淨係要做這些開業準備工夫，他已瘦了二十多磅。
1.曾生話做茶餐廳工作時間長，所以最好要吃得苦。
2.樣樣要親力親為，不可假手於人，力不到不為財。
3.要懂得所有做麵包和沖奶茶咖啡的步驟，不懂的更要學。
4.對國內員工要有耐性，因為他們始終比香港人進度慢。
在內地做食肆行業，領的牌照比其他行業多，好像曾生在番禺開食店，首先要到衞生局領一個「衞檢牌照」，然後再到工商局領「工商牌」，跟住便是「稅務牌照」、「消防牌照」和交「環保費用」，這商場還要向食肆徵收「治安費」，所以每個地區和每間商店要繳交的費用都略有不同。
當所有爐具和食品都齊全準備開業時，曾翰文還未知道原來困難還未完全過去。
「我誓估唔到原來做茶餐廳係咁辛苦嘅，尤其是開業嘅第一日，場面簡直恐怖。因為茶餐廳喺呢度算係新鮮嘅事物，所以特別多人入嚟試，而我本身又唔係做開呢行，所以對落單同運作都唔係好熟，最慘係可能太擠迫，有兩個細路推冧玻璃大門，幸好安裝新門之前，有管理員喺夜間幫我哋看管。你諗吓，嗰日我哋已經唔熟手，廚房又起唔切食物，人又係咁迫入嚟，連大門都爛埋，我當時覺得好恐懼，連續幾晚都發噩夢。」
現在曾翰文的茶餐廳每天都客似雲來，無論內地、港客同洋人，都會入去幫襯。
「我覺得開舖頭最緊要睇人流同地點，我哋嘅地點係所有入屋苑嘅人都要經過，所以會聚集一大班人，而亦因為咁樣，間餐廳嘅英文名叫Visitors?Corner。
「如果你問我有乜要留意，我只可以話最緊要攞齊所有牌照，因為做食店比其他行業嘅牌照多，而每個地方都唔同。喺屋苑搞食店已經好好多喇，因為有好多手續同文件都係由屋苑幫我搞掂，簡單咗好多。」
開食肆的守則比其他行業的要多，而且內地的指引仍未清楚，所以區玉麟律師認為就算店主照足規定攞齊所有執照，萬一發生意外，例如有食客食物中毒的話，店主仍可以刑事罪被起訴，嚴重的可能要坐監。所以做足規定都未必可以令店主受保障，唯一是要確保無食客進食後出現問題。
雖然在商場開舖，所有牌照申請都有人代勞，又有妥善的管理服務，但事前也需了解清楚他們的各項規則，且每個商場不同，以祈福新邨商場為例，便需注意：
1.需逐年簽約
2.不得轉型
3.若想經營其他行業，必須預先通知，然後重新申請所有文件