復活節假期臨近，發展商紛紛部署推售樓盤，而地產代理亦要調派人手到重點樓盤售樓處，盡量搶客增加營業額，不過，唔少代理行嘅後勤部門，竟趁機放假，蘭西聽聞原來佢哋已經積咗唔少假期，再唔放遲吓啲新盤湧出嚟，又冇得放。
長實（001）設響中環和記大廈嘅東涌映灣園示範單位，復活節假期會搞「全港最多款式朱古力復活蛋滙展」，由海逸酒店用瑞士蓮朱古力做咗逾120款復活蛋畀到場人士睇；若即場加入「朗文讀書會」，重可以獲贈50元禮品；另同場增設「兒童圖書廊」，樣樣都係為小朋友而設。
一啲趕唔切在復活節開售嘅樓盤，發展商都會盡量先開放示範單位，吸引買家注意，恒基（012）響鰂魚涌英皇道嘅御皇臺同深水埗嘉裕居，噚日請傳媒參觀示範單位同影相，實行響假期內攞番啲見報率。
恒基（012）屬下嘅恒益物業管理公司，啱啱響「中西區清潔比賽」攞咗7個大獎，聽講話係同類比賽中攞獎最多嘅管業公司。舊年恒益響呢個比賽都攞咗七成獎項。
蘭西