新登場：
墨西哥餐廳　找尋七國口味

AlFresco's，墨西哥文，意思是指出外用膳，一間以此為名的墨西哥餐廳，打正旗號，為經常出外用膳的人提供一個搵食地，有何賣點？賣點是在這裏，你除了可以品嘗到傳統墨西哥菜外，還可找到其他六國，包括中東、美國、英國、意大利、新加坡及印度的菜式，口味國際化，分量加大碼，無論你是何國籍，總會找到你想食！

記者：黃婉冰　攝影：黃子偉

鐵板牛肉軟卷$95
墨西哥卷相等於中國人的米飯，餡料更加是多不勝數，其中鐵板牛肉最特別。選用西冷扒切薄，加入菠蘿汁令牛肉變腍，以青檸汁、黃糖、日式豉油作調味再烤熟，食時將牛肉、酸忌廉、牛油果茸、沙律汁放在自製薄餅上捲起來食，地道墨西哥食法。

試味報告：
三種醬汁一次過放入口，味道複雜得來有層次感，可以食出三種醬汁的不同味道，醬汁不宜落得太多，否則會喧賓奪主，將牛肉的燒烤香味蓋過。

蘑菇雞肉批$90
英國人最拿手各款糕點與酥皮，酥皮做得好，才能有層次分明的效果。揭開層層薄如紙的酥皮，下面是白汁蘑菇雞肉。用白汁將洋葱、雞胸肉、新鮮蘑菇等一同煮熟，鋪上自製的酥皮再焗，出爐已聞到陣陣酥皮的酥香。

試味報告：
先是酥香，切開酥皮後升上陣陣忌廉的奶香，味道夾得恰到好處，忌廉汁的奶味略為重了些，食得多難免有膩的感覺。

Brian推介：
「我最鍾意食蘑菇雞肉批，點解？因為呢度整得好有homemadefeel，忌廉汁幼滑，味道好，同我媽媽自己整嘅好相似。」

嫩滑燒排骨$175
雖叫豬仔骨，但分量並唔少，原條都有十多條骨，特選美國豬仔肋骨，當然是貪其肉質嫩滑少肥膏，先煙後燒，可以做出有煙熏香的效果，一路燒一路塗上燒烤醬汁，是傳統的美國菜，亦是最受歡迎的紅牌菜之一。

試味報告：
豬肉燒得剛好，唔會太乾，尚有肉汁，豬肉一咬即離骨，燒烤醬汁味濃惹味，用手揸住食，很有原始的燒烤風味。

Matthew推介：
「呢度最好食係燒排骨同鐵板牛肉軟卷，燒排骨唔肥，肉嫩滑，我自己一個人可以食晒成份。鐵板牛肉軟卷餡料多樣化，鍾意揀邊樣就邊樣，自己包嚟食，好味。」

番茄醬汁海鮮意粉$90
意大利代表菜點少得意大利粉？不做作，只配以各種海鮮，大蝦、鮮魷、龍脷魚柳，大廚自己用鮮番茄、香料、欖油打茸做醬汁，不加芝士粉，讓海鮮與番茄汁兩位主角盡情發揮，鮮味帶足全程。

試味報告：
意粉分量足以夠三個人分享，海鮮分量足，意粉軟硬適中，番茄汁鮮香唔太酸，番茄味夾着輕微香草味，有着傳統的意大利菜口味。

星洲香辣豬肉炒麵$85
其實是香港人食慣食熟的星洲炒米，只不過今次是由印籍大廚炮製。用咖喱粉將米粉炒香，加入叉燒、蝦仁一齊兜香，鑊氣拍得住大牌檔，用迷你鑊仔盛着上枱，賣相已夠吸引。

試味報告：
咖喱味始終比傳統的略為淡了點，辣度只屬輕微，米粉唔會炒得過乾或油淋淋，略嫌味道未及傳統般香。

雞肉沙律配粗麥粉$70
對於無肉不歡的人來說，對凱撒沙律當然提不起興趣，轉一轉口味，將沙律菜改為惹味的烤雜菜如意大利青瓜、茄子、青椒、紅椒，另加入烤雞胸肉，用中東飯couscous墊底，放在碗形的印式薄脆上，淋上橄欖油、蒜茸、香草，有肉有菜，這道沙律認真不簡單。

試味報告：
烤過的雜菜味道總比普通沙律菜來得惹味，加入中東飯與雞肉點綴，令清淡的沙律口味變得複雜，烤雞肉不肥不膩，味道不錯。

店名：AlFresco's
電話：25226061
地址：中環士丹頓街20號地下
座位：30個
營業時間：星期一至四上午11時至下午3時，晚上6時至11時，星期五至日上午11時至晚上10時。
付款方法：現金及信用卡(Visa,Master)