曾幾何時，本地買衫選擇不多，除外國名牌外，平地貨最出名可以話係Kitterick，加上當年Kitterick開到成行成市，又有附設品牌K2，最記得係開喺恆豐PEOPLE隔籬，同層又有ICEFIRE，係唔少年輕人入貨必去地，但隨住PEOPLE玩完，香港年輕一代受日本影響，又話玩HipHop扮板仔，好多人已經唔記得本地薑了！今日隨住Kitterick再大搞時裝，又開MegaStore又賣家具，生氣加番外，最新力作係玩CrossOverTeeShirt，跟被遺棄動物協會一齊做個小型騷，同樣話畀大家知乜係本地薑。
記者：馮彥彰 攝影：陳盛臣
其實佢哋係一個非牟利組織，由幾位愛動物人士組成，並提供領養動物服務，大家可以去佢哋嗰度領養小動物返屋企養，而最偉大係佢哋會將一些被遺棄動物照顧，且找合適人士領養，此外，該會另一目的係堅持不把動物作人道毀滅，由於個會冇錢，所有嘢都係要大家幫助，今次有Kitterick幫手都算係本地時裝界一大善舉，大家有興趣睇時裝之餘又想養動物就去呢度：
如果你鍾意左剪右車DIY，咁呢次Kitterick同被遺棄動物協會做的慈善活動一定合適，唔理佢哋係發財立品做善事，總之着出嚟夠潮流夠型就得，推出的最大賣點係玩DIY，可以剪袖可以自作業，有心人可以自己玩吓，如果冇Idea就不如睇睇Kitterick佢地點玩法，由離經叛道Cutie以及易着出得街的都有，總之着出街就一定型。
有睇過日本潮流雜誌《Fruits》嗎？專講古怪日本街頭服，靚唔靚就唔想評論，但可以肯定係一種街頭文化同Icon，以另一系列a.y.k，再襯呢件DIYTee又如何？係適合後生靚女Cutie一族。
唔好以為只有女仔先可以咁着法，其實有心思連男仔都可以咁玩，只要加少少料，大膽着波點加珠片就可以。至於着法可以試試70年代，以白色為主，用料加上Cotton，少少玩嘢包你夏天搶足鏡。
其實Kitterick唔止賣衫而已，重會賣唔少其他貨品，包括精品，家具及燈等，大家可以由頭到腳到住屋都有一個Style，最近就追加了唔少潮流家具，想將屋企做到五六十年代又得，又或者把睡房裝飾一下又得，總知想點就點！
地址：銅鑼灣黃金廣場二至三樓
電話：25771118