一味窩輪:9019成為是日輪王

一味窩輪:9019成為是日輪王

長假在前,窩輪炒家冇乜大志,放軟手腳,放貨度假,以致唔少Call輪,冇跟正股走。最明顯嘅係中移動(941)升40仙,但兩隻熱門Call輪9029同9044,只係向上移動1格。
9029同9044冇點跟正股走,原因應該在於揸家唔想揸貨放假,驚住假期內有乜風吹草動,同正股係咪會回頭未必有關。
不過亦有個別中移動Call輪,跟貼正股,9019係溢價較高槓桿率較大嘅中移動Call輪,收23.7仙,升13%,成為是日輪王,有5球幾成交,7月到期,溢價13.5%,槓桿率10.2倍。呢隻輪成交一向唔多,窩輪買賣雖採莊家制,輪價都有時受供求因素支配。
龍虎榜上排第2位嘅崇高公司輪134,收10.1仙,升11%,06年底到期,溢價36%,槓桿率5.8倍。年期長,數據可以接受。

853溢價難接受
龍虎榜上排第3位嘅係耀科公司輪853,收9.1仙,升11%,得半球易手。04年8月到期,雖然大把時間,但槓桿率4.6倍,溢價去到84%,無論如何都講唔通。真係睇好,不如直接揸正股。