有性格唔係唔好，但有時就要識變通先至有前途，日本國寶中田英壽就係最佳例子。中田一向好cool，早排對國家隊教練杜斯亞同埋隊友都唔多瞅睬，於是杜斯亞無論係集訓或者隨國家隊出外比賽，都硬性規定鍾意收埋自己嘅中田，要同隊友同房，搞到中田同杜斯亞面左左，重可能連世界盃都冇得踢。
不過，可能中田諗通咗，知道咁同杜斯亞鬥氣並唔係辦法，於是多咗同隊友交流，咁杜斯亞亦都好識做，喺禮拜三日本作客波蘭，畀中田一個人住一間房，唔知係咪因為呢個關係，中田表現不知幾好，重替日本先開紀錄，協助球隊贏二比○之餘，世界盃中場嘅正選位肯定冇走雞囉！
不過美中不足嘅地方，就係中田對住班傳媒就依然cool到痹，唔知佢會唔會改吓啲脾性呢？
講開禮拜三嘅國際友賽，戰果都咪話唔反覆，賽前一般以為呢啲冇乜競賽意義嘅波，應該和波特別多㗎啦，點知淨係計有開盤嘅十五場比賽，就只係得四場和波。不過，並唔係我求大俠認叻，但我哋蘋果波經嘅過關三串四所推介嘅三場和波，就順利全中，重有五十幾倍分頭㖭！跟者，復活節快樂囉。
所謂笨人出手，噚日溜馬嘅謝美恩奧尼爾唔單止出手撞活塞嘅威廉臣，連勸交嘅球員佢都想打，今日即刻有報應，俾聯盟罰停賽兩場兼罰款，佢三位隊友因為離開後備席亦要停賽一場，究竟佢哋知唔知𠵱家係爭入季後賽嘅重要時刻，如果我求大俠係佢哋教練，肯定要抦餐懵。
噚日我求大俠啱啱講到意大利傳媒向國腳施壓，批評佢哋唔肯響賽前列隊時唱國歌，結果班國腳似乎妥協咗，喺前晚對米字國時雖然唔係個個響奏國歌時都肯唱，但至少個個搭晒膊頭，表現得好團結同整齊。不過好衰唔衰，王子托迪又唔爭氣，鏡頭影到佢時竟然忍唔住笑，真失禮。