今日開始放長假期，小初噚日懶到淨係坐定定睇機之際，經紀陳就失驚無神殺到嚟，叫小初留意1隻超級無敵冷門股德信控股（758）。
呢間公司主要在武漢做房地產，前日突然出現大手成交，原來公司話，大老闆前日80仙減持2000萬股，佔該公司已發行股本成6.68%咁多。
佢話，德信向來都冇咩動作，兼且貨源極度歸邊，但係呢1個月內，股價無情情由唔夠70仙，一路mark到去80仙樓上，然後又竟然有人一手接咗咁大手貨，若然唔係有心人，無端端又點會夠膽接呢一手貨，嚟睇似係有嘢做緊。
不過，德信噚日只得一手成交咁大把，收84仙。經紀陳就話唔使咁心急，等德信下月公布完全年業績，好快趣就會有動作。
另外，一路有大戶沽貨的南海控股（680）突然勁升36％，收1.9仙。但經紀陳就話無謂玩，皆因人地剛削減股本面值，似係為集資鋪路。