自去年底開始，沈德寶莉投資經營的BodyByDeborah國際美容健美中心已傳出財政不穩的消息。至上月初兩間健美中心更停止營業，指公司需要內部重組。昨日，沈德寶莉終帶淚宣布BodyByDeborah正式清盤。
經營BodyByDeborah國際美容健美中心的沈德寶莉，昨日下午四時半在一名林姓友人陪同下，在灣仔利景酒店會見記者，正式交代其公司因香港經濟環境變差，致使經營成本與收入不成比例，最後迫不得已作出清盤決定。沈德寶莉在記者會上並不接受記者提問，只一口氣說出公司的不景狀況，其間更多次淚灑當場。
昨日身穿米色服裝的沈德寶莉花了近十分鐘，交代健美中心清盤事宜，她說：「由於香港經濟一直下滑，消費市場變差，而公司一直係抱住提供高質素服務畀客人嘅態度經營，但係經營成本同收入不成比例，影響到公司資金周轉不靈。而公司喺上月初臨時停止服務，我喺呢個幾月內好努力咁去搵投資者，希望可以喺資金同經營方面重組，我冇放過任何一個機會。」
此時，沈德寶莉開始哭泣說：「無論香港、內地，甚至海外嘅投資機會，我都冇放棄去接觸，我甚至同本地一啲大規模嘅健美中心傾過，希望健美中心可以喺呢個月十六號重新營業，但係好不幸，經過連番洽談，我同各方面都達唔到協議。我想重申一句，BodyByDeborah對我、同我公司都好重要，客人多年嚟對我嘅支持，畀咗我一份好大嘅推動力，令我唔會放棄呢份心血。
「但係公司唔可以無限期咁喺度等，為咗保障員工、顧客同債權人，BodyByDeborah決定自動清盤，對於呢個決定，我致萬二分歉意！」
說罷，沈德寶莉便離開記者會，並稱不會接受任何訪問。而一直陪伴沈德寶莉的林姓女士，則表示BodyByDeborah的事宜已交由BakerTilly清盤官處理。至於BodyByDeborah旗下不超過一百名的員工，可向勞工處求助。記者問林小姐，BodyByDeborah顧客當中，不少是一早預繳大筆費用，購買美容代用券，這筆費用共有若干？林小姐則表示不方便交代。
86年--與拍拖十個月的菲力艾雲結婚，婚後一直為丈夫打理菲力偉健美中心生意。
95年--與結婚近十年的菲力艾雲離婚，並取得一對子女的撫養權。
97年--投資三千萬元開設BodyByDeborah國際美容健美中心，與前夫對着幹，同年她並獲「十大傑出青年」獎。
去年12月--不屑前夫菲力艾雲獲得「最佳健體會所大獎」，而與前夫展開罵戰。