唔知係唔係因為經濟不景嘅影響，好多組織資源缺乏，籌款唔易，一位教授同左丁山講，為咗醫院建設，佢簡直係沿門托砵，睇見哈佛、史丹福、哥倫比亞大學可以一年接受捐款幾十億港紙，簡直羨慕到流口水。
民間志願組織因此爭取政府撥款，爭到頭崩額裂，政府其實亦為財政頭痛，限米煮限飯，大家想唔將就吓都唔得。團體如此，個人又如何呢？香港人𠵱家好易患上眼紅症，郁吓就去嘈，一啲做義務公職人士不禁頭擰擰。
話說一位有錢人家做公職，為咗諮詢民意，久唔久就搞吓肥佬黎最鍾意舉辦嘅FocusGroup，聽取意見。有一次佢開呢啲小組討論嘅時候，想飲咖啡，但開會地點嘅政府部門冇得供應，於是叫人到附近買咖啡，佢無理由剩係買畀佢一個人飲㗎，為咗禮貌，於是一買就十幾杯，以為與會者一定高興。
可惜有一位市民唔高興，佢話（一）點解要請飲咖啡？（二）點解咁浪費要買Starbucks咖啡？跟住重要寫信投訴。有錢人家知道投訴之後，好唔高興，但又無可奈何。
左丁山知道之後，急忙叫秘書買定一啲即溶咖啡，以備不時之需，否則有日請人飲杯Starbucks驚住俾人懷疑我公司收費高，食水深㖭；香港社會現時到處眼紅紅，你唔抵得我，我又唔抵得你，最好就係扮窮先至係政治正確，呢個年頭做義務公職，好易無端端嬲親㗎。