為防止經紀代售一手樓打架事件再出現，發展商手法有硬有軟。九倉今次賣屯門翠濤居，就用軟功，特設最守紀律代理獎。由於翠濤居示範單位設在海運大廈商場地庫，秩序更加重要，所以九倉助理董事黃光耀特別強調，商場保安由一名前G4（警隊保護證人組）人員主理，相信今次代理要打架都難。
地產發展商同業界人士都話今年住宅樓市會向好，樓價重有得升㖭，當然亦有人唔認同，好似八達通行政總裁戴勇牧就係其中一個，佢估計未來3年樓市最多都係平穩，重話「唔跌已經好好」。佢話來港9年，都係租樓住，原因係樓價唔合理，到𠵱家睇法都冇變。
因電影市道差而轉行嘅導演林德祿，剛以486萬元，賣咗佢嘅西貢曉嵐閣1座中層C單位，面積1288方呎，帳面蝕咗424萬元。
美聯剛成立咗個義工服務委員會，由執行董事林鳳芳做委員長，今個禮拜日就贊助兩個機構嘅小朋友，響皇后戲院睇經典電影E.T外星人。
蘭西