子宮的形狀似甚麼水果？（梨）輸卵管是靠甚麼運送精子呢？（絨毛）男生的性腺是甚麼？（睪丸)……大人看到以上問題，是否有點臉紅呢?!但當你面對4名剛獲得性教育問答比賽冠軍的小學女生，發現她們的性知識非常豐富；不知是可悲還是可喜，她們的知識源頭居然是靠平日閱讀課外書所得！家長及老師……近乎隻字不提！對她們來說：「大人太保守嘞！其實佢哋都識嘅，但又唔講我知，講性又唔係咩特別事，係人都有㗎啦！」
記者：梁佩芬
攝影：黃子偉
四位小小性博士來自佛教陳式宏學校上午校六年級，在剛過去的星期日，由家計會主辦的「小學生性教育問答比賽」中，擊敗其餘三間小學的代表，奪得冠軍。原來她們只用了兩星期準備所有性知識，包括身體結構、詞彙甚至法律問題。從言談間，小記發現她們認為性是圍繞日常生活中的一點一滴，當中也有喜、怒、哀、樂；言語間她們絕不忌諱，好像正在談論歌星偶像般侃侃而談。
記：記者
吳：吳翠婷 陳：陳樂怡
盧：盧詠詩 鄭：鄭曉敏
記：爹哋媽咪有冇同你講過有關性問題？
陳、鄭：無！完全無講過！
吳：我一問媽咪，佢就叫我問阿姨，因為阿姨係護士，知得清楚啲喎！
盧：（突然大嗌)媽咪有主動同我講！（點解呀？)因為上年某日下晝我「唔覺意」開咗佢哋房門，見到佢兩個唔着褲瞓係牀上面，我當時好驚，企咗喺度唔知點好！第二日，媽咪主動同我講噚日發生嘅事，但又係講啲唔講啲，話係正常行為，下次唔好亂開門，又話唔好周圍講。其實佢唔講我都知佢哋做乜啦，只不過第一次見到有啲驚！
記：喺學校有冇試過同男同學談性？
陳：我都唔想同佢哋講呀，以前一上常識堂，佢哋一聽到青春期就哈哈大笑，之後we嘩鬼叫，成日諗鹹濕嘢，唔正經！
吳：啲男仔好衰㗎，最鍾意掀女同學條校裙，之後圍住個女仔係咁笑；有幾次重離譜，有個女同學「月經」到，唔覺意留咗幾滴喺裙度，啲衰仔一見就係咁講，重笑個女仔有BB，玩咗成個禮拜，個女仔就喊咗足足一個星期！
鄭：我覺得佢哋唔啱囉，月經係正常生理現象，做乜笑人喎？毫無見識，大驚小怪！
記：你哋啲性知識喺邊度知道？
吳：讀五年級嗰時上常識堂有講「青春期」，有講男女身體變化，但係準備比賽，「拍烏蠅」Sir專登畀多幾本有關性嘅書我哋溫習，裏面有講身體結構、性的詞彙、法律問題、性侵犯及其他日常接觸的性問題。
盧：佢只係畀我哋睇，完全無教過我哋，阿Sir始終都係怕羞！
陳：我哋幾鍾意呢啲書，有圖畫，文字淺白，但最衰只得中文名，頭先有條問題係「陰莖的英文名是甚麼？」令到我唔識答，唔開心？（記：咁𠵱家知唔知英文名係……）四人大叫：P-E-N-I-S囉！
記：你哋覺得學校書本的知識足夠嗎？
四人大叫：梗係唔夠啦！（爭着回答）本書講嚟講去都係身體結構，咁嘅嘢我哋平時睇圖書都有講啦，上堂Miss又講到一嚿嚿，唔清唔楚。
記：你覺得性教育重要嗎？
吳：（一臉正經）重要！其實都好普通啫！如果大人成日唔講，細佬仔好奇都會問，或者自己搵答案。
鄭：平時我哋乜書都睇，都有興趣。但我哋發現，市面講性的書一係太深，全部字又無圖，一係太淺，基本知識係人都知；最好有一些是分年齡的書籍，但係香港都未發現有！（失望！）
記：你哋最想知道邊啲知識呢？
鄭：唔……荷爾蒙……（吓？）我只係聽過呢嗰名詞，但其實就係佢影響所有身體變化，我重想知多啲。
家庭是兒童最早接觸的地方，父母是孩子談性的最佳人選。「性」是與生俱來的，也是成長的一環，若家長能放開襟懷，接納孩子的性好奇，積極負起教育的責任，便能為孩子灌輸正確性觀念及態度。家計會的性教育網頁內，有不少有關家庭性教育的文章及資料，父母可參考後與子女一起分享。
網址：