聯通（762）晏畫派成績表，賺44.6億元人民幣，好過市場預期，股價應聲彈起，收7.60元，升4.8%，帶動其他電訊股同埋大市。
中移動（941）收23.70元，升75仙。中移動抵過聯通，後市繼續睇好，兩隻熱門Call輪9044同9029，同升3仙，未升得夠，後便大把水位。
和黃（013）係半隻電訊股，升1.50元或2.2%，又係有餘未盡，揀啲和黃Call輪炒吓，搵銀之道。
和黃熱門Call輪係9050同9110。9050升4.5仙，9110升6.5仙，兩隻輪條件好近磅，輪價升幅應該接近啲，9050升得少，就揀呢隻。9050（8月到期）現價47.5仙，溢價9.9%，正股有彈跳力，咁嘅溢價唔離譜，槓桿率14.5倍，相當爆炸。
電訊股中，電盈（008）企定2元，比數慢熱，電盈Call輪值得收集。
電盈Call輪正路對象係9111，經紀大佬叫佢做「9全1」，一如叫宏安（1222）做「1全2」。9111（8月到期）現價29.5仙，溢價7%，槓桿率6.8倍。聯通升後，帶動中移動同電盈，9111好快有嘢睇。