阿董重視教育，八方認同。最近有班家長同八方投訴，話演藝準備「陰乾」專為六至十六歲嘅小朋友舉辦的舞蹈課程。
要知道藝術教育都係屬於教育嘅一種，咁咪即係開優質教育嘅倒車？演藝陰乾嘅手段，就係宣布唔再收新學生，舊班一旦少過十二人就要腰斬。
有個讀咗演藝呢個課程七年嘅陳同學同八方講，聽到呢個消息，感到好震驚同可惜，因為外間其他類似的舞蹈課程，無論師資、環境同課程編排，都絕對比唔上演藝呢個有十七年歷史嘅課程。
班家長同八方講，好多學生父母都喺金融風暴中成為負資產，但見到仔女鍾意，就算死慳死抵捱麵包，都要繼續畀每年七、八千嘅學費，𠵱家都唔知點同細路解釋學校唔俾你哋返學跳舞。演藝就解釋話因為資源唔夠，要集中發展全日制課程同照顧十四歲以上學員。雖然經濟再差，八方都唔忍心見到細路仔受影響，希望政府可以撥多啲資源，否則香港嘅小小王仁曼同小小張天愛又少個學跳舞嘅好環境。
E-mail：