剛於去年，奪得全中國汽車拉力錦標賽總冠軍嘅香港車手陳自華曾獲獎無數；除有賴充當領航員嘅太太Winnie全力支持外，一部可靠嘅實戰賽車，亦可算係佢致勝之道嘅一部分。然而，一直以三菱LancerEvo.出戰嘅佢，今年改投富士懷抱，自言希望以至佳裝備同賽車衞冕飛車王嘅美譽㖭；究竟呢位數一數二嘅華籍車手，又點睇呢部富士最新嘅WRXSTiTypeRASpecC跑車呢？有興趣嘅朋友就不妨留意吓喇！
記者：陳偉林 攝影：陳偉強
據知，今趟陳自華改投富士車廠，除卻車廠嘅一番誠意外，佢對富士ImprezaWRXSTi戰車亦有好高嘅評價；而為咗應付今年全中國汽車拉力錦標賽，廠方更特意提供兩部於去年底出爐，兼且係至新至Top嘅賽車特別版，WRXSTiTypeRASpecC戰車作為佢嘅座駕㖭！睇嚟陳自華與佢嘅全新戰車，定能於各場賽事當中，創出不錯嘅成績㗎！
查實，上一代ImprezaWRX亦有RA版型號，更曾以超值價響香港發售，並瞬即被搶購一空㖭！然而，呢部至新嘅TypeRA型號比舊有更高級，皆因佢係WRXSTi嘅RA版本，而SpecC則係專為比賽而設計，有超輕量嘅車重，加上原廠STi賽車部門嘅研製，不單止產量少，而且廠方規定唔會公開發售㗎！
據廠方資料所知，呢部WRXSTiTypeRASpecC戰車，機械及引擎配搭跟一般ImprezaWRX型號相若，惟車重則輕多100kg以上，而且車重分布平均，不僅刪減原來霧燈、尾翼同包圍外，頭冚及兩邊門鏡重以較輕嘅物料製造，而標準化嘅四輪配搭重係16吋嘅鐵軨呢！另外，如四門電窗、電鏡、原廠冷氣及音響等其他設備亦一一欠奉，就連安全氣袋及ABS系統亦沒有，務求響細微處，造就出要比LancerEvo.RS版輕70kg嘅重量嘛！
至於引擎部分，雖然同屬一台EJ20嘅2.0公升水平對向四汽缸Turbo偈，但為要應付賽事而給重新調校，馬力維持不變，惟扭力卻提升多1.2kgm，較對手LancerEvo.RS版本高出0#.2kgm，配合埋一套至新密比牙嘅6前速手動波箱，要較LancerEvo.RS嘅5前速配搭出眾，相信兩者實戰比拼，定會有一番激戰㗎！
引擎：1994cc水平對向四汽缸Turbo
馬力：280ps/6400rpm
扭力：39.2kgm/4400rpm
傳動：6前速手波，恒式四驅
懸掛：（前）麥花臣支柱（後）麥花臣支柱
制動：（前）透氣碟（後）透氣碟
輪胎：205/55R16
尺碼：4405×1730×1425mm
軸距：2540mm
車重：1290kg
查詢：意美汽車（23968380）
曾經以三菱LancerEvo.參加過無數比賽、並曾獲得中國拉力錦標賽（上海第一站）全場冠軍、2000年中國亞太區韶關分站全場季軍等優異成績嘅陳自華，自言對富士ImprezaWRXSTi賽車並不太認識，而呢部最新嘅TypeRASpecC賽車，更係測試前一天才運抵香港；然而，陳自華經過一輪測試，及至將車駛往有高難度嘅大帽山荃錦公路一段，直達大帽山頂後，首試嘅感覺係呢部TypeRASpecC戰車，不僅較LancerEvo.來得輕巧，就連加速、轉向及制動亦來得直接同靈敏，尤其係一套密比牙嘅6前速手動波箱，要較5前速波箱設計轉數用得更盡，動力流失亦較少。縱使，LancerEvo.有電子AYC同三組模式嘅ACD電子系統輔助，惟比較起TypeRASpecC嘅機械式中置限滑差速器，後者要來得更直接了當，隨心意嘅扭力分布調校，正好給老練嘅越野賽車手，以甩尾動作過彎呢！
如果大家有興趣，想知道更多關於陳自華嘅資料，同埋睇吓一啲關於佢參加各項賽事嘅相片的話，就不妨到佢嘅官方網頁睇睇喇；入面除有齊陳自華參加過嘅賽事紀錄外，更有不少相片及剪報㖭。係啱的話，就不妨跟住下面嘅網址，Click入去睇睇喇。
網址：