港股尾段自低位抽高，跌幅收窄至49點，收報10786，而即月期指更轉呈高水62點，看來好友已經開始做手腳，只要美股無頭暈身熱，相信要在10800以上結算都不太難。
市場傳出有中資想入股139控股（139），以致此股噚日晨早就急升逾20％，午後公司發表聲明否認，並強調不會配股，但股價仍進一步上升，收報0.041元，升幅擴大至41％，成交達666萬元（嘩！魔鬼的記號）。Cookie話，中資入股唔一定要認購新股，可以直接在市場增持，所以股價又有咩理由唔升呢？不過，以成交只得666萬元嚟睇，相信炒家唔似係中資喎。
創維（751）噚日勁升9.6％，收報0.57元，成交高達1597萬元。有消息話，有個芬佬想沽1億股，每股0.5元，套現5000萬元。此股逆市急升，擺明係托價配股散貨，手法比較差，ｉ師傅話，有興趣接貨的人唔多，今日股價將要調整。
萬勝（376）表明話賣盤，但復牌通告中只係話磋商只處初階，股價復牌後，股價完全無異動。黑客話一啲都唔出奇，因為睇萬勝盤數都比較花工夫，就算有投資者好有誠意收購，都唔容易傾得埋。
tom.com（8001）今日又將會宣布在國內收購媒體業務，通常在公布前股價都可以炒一轉，不過，此股上升破4元之後就會壓力增加，不過相信可望升至4.2元，有6％上升空間執吓。噚日此股表現亦較硬朗，收3.95元，逆市升1.28％。