世界盃未到，商台班DJ同大律師公會已經急不及待，昨日喺沙田踢咗場波過吓波癮。咁到世界盃開鑼，邊個會飛過去南韓同日本捧場呢？
飛哥五月開咪講波
八方噚日就喺球場見到兩隊波嘅領隊，商台領隊就係李鵬飛同鄭經翰，大律師公會就係馬丁李柱銘同梁家傑。原來飛哥三月三十一號會飛去睇開幕禮，兼睇一場法國隊嘅賽事，馬丁則掉番轉，六月三十號先飛去睇閉幕禮同決賽。
話說飛哥係由大仔出錢撲飛請老竇，真係廿四孝！飛哥五月重會於商台開咪，主持一個叫《飛哥主場》嘅節目評世界盃。佢重透露自己最睇好巴西、阿根廷、義大利同法國（馬丁都係法國隊Fans）。
講番噚晚場比賽，原本商台以為好易打贏大律師公會，點知一落場先知對手唔易應付，一開波三次急攻埋門都係由大律師公會嗰邊發起，商台急起直追，但就冇運只係中門楣。結果大律師公會贏二比一，飛哥大歎商台連運都輸埋。
大律師公會事後爆料，話自己有秘密武器，就係黃志文律師。原來四十二歲嘅黃律師二十幾年前踢過愉園青年軍，係半職業球員，中五之後先棄武從文，專心讀書，𠵱家做咗大狀。噚晚黃律師就射入第二球，為大律師公會奠定勝局。
E-mail：