功夫Ｌ呢個禮拜好唔得閒，皆因日本生意朋友來港，由功夫Ｌ親自招呼。唔好以為有個日本拍檔好巴閉，功夫Ｌ解釋：「日本經濟謝咗咁多年，難得𠵱家咁多香港水貨舖過去入貨，嗰邊又有香港熱，自然同我哋港人有甜蜜關係，家陣香港水貨佬大大話話都有五、六個生意拍檔，有幾咁奇？如果啲小老闆因此晒命，真係笑壞人。」
招呼日本仔不離帶佢哋行中環尖沙嘴名店，功夫Ｌ：「裏原宿牌子個價難企硬，𠵱家日本仔轉賣名牌小物，香港賣價平，『姑慈』漁夫帽、直角V旅行鎖就係被佢哋掃晒返日本賣。」
除此以外，香港獨有古靈精怪貨佢哋都一律帶過去賣。日本仔問是否有本護照Size猿人迷彩膠套，原來當地都有巿場。打探之下，應該指早前一本旅遊天書《東京地圖王》所送贈品，報檔早已賣清，只剩下灣仔188的Jump書屋有售。真係世界變，日本仔都要來港走水貨，而且重要托到膊頭瘀晒，證明生意難撈。
主持人：大食Jack
八卦熱報：