自從Canon推出數碼相機中最高機種EOSD30後，用家都頗喜歡其高質素拍攝效果，以及快速對焦、儲存及操作反應之爽快，故早排Canon公布後繼機EOSD60規格時，Fans對其六百萬像素CMOS引頸以待。新機喺三月底全球同步推出，今日搶先為大家作一個測試報告。
記者、攝影：徐影龍
ImageGirl：Natalie
EOSD60規格表
感光元件：652萬像素CMOS
快門：1/4,000至30秒
ISO：100/200/400/800/1,000
對焦：自動式三點對焦
光圈：視乎鏡頭而定
相片格式：RAW（不壓縮）、JPEG（經壓縮）
儲存媒體：CompactFlash
電池：專用鋰電池（BP-511）
體積：149.5(W)×106.5(H)×75(D)mm
重量：780g
新機EOSD60打正旗號屬D30嘅後繼型號，機身同D30同樣沿用傳統菲林機EOS30嘅外殼，三者完全一樣，機背按掣及機頂功能旋鈕亦大同小異。新機最大改進地方，就係採用652萬像素CMOS為感光元件（有效像素630萬）。當初D30宣布採用CMOS為感光元件時，曾被用家懷疑拍攝質素，到D30正式售賣時才將謠傳打破，證明CMOS都可符合專業用家要求。相片最高解像度可達3,072×2,048，較舊型號優勝處在於提供中等級數相片選擇，除最高質素之RAW格式外（7.4MB），重有六種JPEG尺寸級數揀選，真正切合用家要求。
另一重點改良為連拍速度。在FullFilm情況下，雖同舊型號D30一樣為每秒三張（3fps），不過D60為六百萬像素，比D30高出一倍，理論上其連拍速度可算快上一倍，呢點亦係高檔機優勝之處，拍攝動態影像如出外影Show等用途，操作反應快已是指定動作。有效對焦EV值（曝光值）亦由EV2至EV18降低至EV0.5，即黑暗環境對焦能力更強。其他機能方面改動不大，同樣採用三點對焦系統、35分區測光、快門為1/4,000至30秒（設B快門）、儲存媒體為CompactFlash等，舊有用家適應上絕冇難度。
過往用家一致認為D30拍攝相片偏向柔和，顏色亦偏暖。測試新機後發覺情況已有改善，人像邊位Sharp了不少，偏色情形亦有改進，最重要係過往拍攝全身人像時就算收細光圈至f16，都總覺唔夠Sharp，幸好新機喺呢方面亦有改進。
記者意見
抵讚：六百萬像素CMOS、連拍速度等真正切合專業用途。
要彈：ISO感光度由過往1,600減至1,000，減低使用靈活度。
在打印機方面，Canon同一時間推出兩款新產品，都是三月底出街，硬件規格方面分別不大，主力改進打印速度。相片打印解像度最高為2,400×1,200dpi及採用四色獨立墨盒，雖並非同廠中最頂級質素，不過足以應付一般用家要求。
新機同樣對應Canon新開發VividPhoto技術，將顯示屏忽略之色域範圍（ColorSpace）重現，特別係藍、綠兩色，對於拍攝山明水秀之風景相尤其適合，原理跟EPSON提倡之PIM技術相似。兩部Printer都附送一款3D相片DIY軟件，可將人物及背景分離，作不同程度之立體化處理，配合對應相架，便可令相片立體化，送畀朋友認真盞鬼。
對於普通用家嚟講，2,400×1,200dpi、5微微升墨點（pl）、無邊打印等已非常足夠，加上速度上亦比同級機為快，列印大量文件如功課等用途時就可慳番唔少時間，新加入之DIY立體相片亦算好玩。
基本功能同S520一樣，速度上就快成條街。打印單色文件可達每分鐘20張（20ppm），媲美辦公室之雷射打印機。含圖片文件為每分鐘9張（9ppm），A4尺寸相片則約1.1ppm，可以話S750較為適合小型辦公室之用。
CanonHK
查詢電話：21702828