近期潮流大興迷你車，可真是魅力沒法擋，好似早前預售嘅新款MiniCooper，咪以為淨係香港至咁勁，原來響東瀛市場更誇張，開售幾日就經已賣過近2萬部，就連佢哋土產嘅新款日產March，發售唔夠一星期亦賣過2萬多部，又難怪會有咁多車廠，都大表關注同想分一杯羹啦！
就正如近排車氣急升嘅萬事得，早輪響日內瓦車展上，除咗全新Mazda6備受矚目外，另一部概念新車MXSportRunabout亦同樣吸引；唔知內裏嘅人，只係會當佢係一部ConceptCar看待，但原來佢會係全新Demio嘅化身，除咗以歐洲作主打市場外，本土嘅東瀛亦係重點所在；全新造型富剛勁感外，兩台新開發嘅1.3及1.5公升引擎，據聞低轉同耗油量表現突出，相信勢必對豐田Yaris（即港版Echo）、本田Jazz同日產March，有一定嘅威脅性。再者，呢部新Demio嘅輪廓重有點豐田ist嘅影子㖭！睇嚟當新車響6月推出嗰陣，定會給迷你車市場帶來衝擊，唔知香港又會否同期開賣呢！