賭波合法化也好，規範化也好，總之特區政府嘅決策，就十足係議論未定，兵已渡河，周街賭波賭到㷫合合，政府重「以市民意見分歧為理由，強調目前應以較多時間小心評估應否實行這一措施，不應倉促做決定，而政府會密切監察即將舉行的世界盃賽事中非法賭外圍波的情形」（引自報道政府新聞嘅權威報——《大公報》）。
究竟要幾多時間先至係「較多時間」？唔通要評估到二○○四年歐洲杯賽事之後？外國佬、外國莊家真係笑歪嘴；我哋啲決策官員似十足天上神仙，不食人間煙火。
同Y老總傾偈講起，原來佢唔打波（高球也）、唔跑馬，有時間打麻雀，獨沽一味就係睇波賭波，至於如何賭法，老總話：「多籮籮，唔使畫公仔畫出腸。」賭波有冇贏錢呢？Y老總話：「輸多過贏，本來完全理智就贏面高啲，但情感上總係會捧自己嘅擁躉，例如曼聯、利物浦。舉個例，如果曼聯對某隊嘅盤口讓球半，自己估計曼聯作客讓唔起，應該買下盤，但情感上，自己睇波之時，唔鍾意睇住自己賭嗰隊俾曼聯㩒住打，個仔喺隔籬會猛咁嗌希望曼聯入波，冇理由阻止佢啫。所以事前會投注落曼聯度，經常情況就係曼聯贏一球，兒子高興，我就輸錢！」Y老總嘅情感幾豐富，炒人減薪削稿費之時就手起刀落，絕不手軟，想落，要攞佢嘅着數，惟有搵一場波同佢對賭。