北海道除了食海鮮、浸溫泉與滑雪之外，尚有搵銀三寶，第一寶係「朱古力」，最出名嘅係嗰隻唔知係「白 戀人」定係「白癡戀人」，差唔多間間舖都有得賣，是手信的必然之選。朱古力靚其實某程度上係因為當地嘅鮮奶靚，平時基本上我完全唔飲奶，但到了北海道，差唔多每日都會整番杯奶飲吓。北海道之「雪印牛乳」乃是奶中XO，又香又滑又有奶味，最神奇嘅係本來我嘅腸胃唔太受得奶，但「雪印牛奶」就冇問題，唔通腸胃都識貪慕虛榮，飲名牌就冇問題？
第二寶係「熊出沒注意」。據講北海道之樹林有熊出沒，看過標本後發現是似狼多過似熊、奀佻鬼命兼唔可愛嘅瘦熊。善於包裝嘅日本人將此概念製成大量「熊出沒注意」嘅產品，T恤、毛巾、煙灰缸，總之乜嘢都整個「熊出沒注意」商標上去就可以賣貴幾成，旅遊人士無一幸免，我就買咗一大袋番嚟做手信。
最後一寶亦係鎮山之寶就係HelloKitty。HelloKitty最離奇之處就係每個地方都會發現一啲獨有嘅產品，例如北海道盛產薰衣草，於是就出現了一大批薰衣草HelloKitty，北海道獨家發售，第二度有錢都買唔到。女士們見到HelloKitty好比見到親生骨肉，抱在懷中又呵又錫，幾乎想餵奶咁滯。大嚿祖與我對住這件有眼冇口的小白兔，唔明白佢究竟係姓Hello定係見到面一定要講Hello，反正就為日本政府每年帶來超級可觀嘅收益，經濟效益上叻過我國嗰班淨係識坐喺度食竹葉，食飽又唔願行房嘅佳佳、安安多多聲。唔知真係可唔可以攞隻佳佳去換隻HelloKitty番嚟，又或者將佳佳同HelloKitty打種，出嚟嘅產品應該都係一條財路。