美股前晚加速調整，杜指急挫146點。港股跟跌乃意料中事，恒指噚日最多跌過121點，低見10715，補晒月初嘅上升裂口就反彈，恒指最終跌49點，收10786。
近日美股之跌，理由係驚加息，趙飛雲雖然唔同意，但技術上美股確有需要調整，港股亦然，故此清貨觀望。杜指經過前晚一跌，技術指標已轉壞，若短期上升軌支持（目前約在10250）失守，可能要落到200日線（9991）才完成調整浪，即係重有300點跌幅。
睇番港股，除非恒指能以大成交重上萬一點之上，否則仍會反覆尋底，再試10400水平嘅機會唔細，即係要再跌三四百點。恒指2月初曾低見10393，3月初見10387，若美國經濟復甦不是假象，相信恒指今次就算再試該水平，仍可守穩，形成3底回升，到時又係大買藍籌股輪嘅良機。
坐喺度等，唔係趙飛雲嘅性格，噚日見到隻佑威（627）有勢，買番多少炒一轉；呢類實力細價股，未必跟大市走也。佑威納米技術惹人憧憬，聽聞今年盤數會好靚。較早前佑威以0.69元配股後，跌過落去0.59元，呢兩日開車殺上，昨收0.68元，若能突破配售價，短線可重遊高位0.75元。