點解阿仙奴咁多傷兵，學法國隊教練拿美爾話齋，皆因該隊領隊雲格將班球員用得太盡。
法國隊教練拿美爾日前就好㷫咁話，係阿仙奴搞到皮利斯要長唞，佢認為皮利斯喺正常情況底下，應該唔會咁易受傷，但佢成日咁踢，體力頂唔順，先至搞到傷得咁嚴重。
話就話拿美爾有啲打橫嚟講，但諗真啲又唔係冇道理喎；事關雲格要皮利斯、韋拉同埋亨利踢成四、五十場波，用到佢哋殘晒，點幫法國隊衞冕呀，所以話拿美爾唔㷫就假嘞！
雲格幾乎場場要皮利斯、韋拉及亨利班法國兵打正選，無非都係想幫球隊攞佳績，但估唔到弄巧反拙，累皮利斯提早摺埋，踢唔踢到世界盃就未知，但佢哋要做超聯同足總盃雙冠王嘅機會又低咗。
查實阿仙奴有頗多後備，有伊度、稻本、簡奴同彭拿治等，如果雲格夠膽學曼聯領隊老費咁多派啲後備或新人落場輪流踢，可能唔使搞到今日咁嘅田地囉！
有啲球隊覺得老婆仔女嚟捧場，球員會有超水準表現，不過愛爾蘭足總就唔受呢套，佢哋話明，如果球員嘅老婆仔女想到日、韓睇世界盃嘅話，就要球員自己畀錢嘞。
愛爾蘭足總嘅頭頭重話：「市道唔好，有錢都寧願留番嚟發展足運啦！我哋將決定權畀番球員，咁咪重好。」
唔好以為迷信呢家嘢係中國人嘅專利，其實外國人一樣好信邪，德國足總決定喺呢個世界盃換上類似六六同七○年嗰兩屆決賽周嘅懷舊Look球衣，佢話貪德國隊兩屆，分別入決賽同四強老利
國際米蘭畀朗拿度歸隊踢巴西對南斯拉夫場波，唔代表球會同佢關係好。教練古柏日前就話，如果朗拿度唔好好調理傷患，足球生命頂多剩番三年。另外，古柏重猛讚國米今屆成功係因為班球員專心為球會賣力……，呢句話擺明寸嗰個成日返巴西嘅朗拿度啦。哨牙仔真係要好自為之嘞。
花名「大吉」年僅二十一歲嘅南華新晉前鋒陳豪文，佢老婆噚日朝啱啱生咗個七磅幾嘅ＢＢ女，𠵱家等緊睇相佬幫囡囡改名。咦！「大吉」好似結婚唔夠五個月，咁快會有ＢＢ嘅？無所謂啦，後生仔女嘅防守係咁上下㗎嘞，「大吉」喺球場識得入波就補番數啦。
𠵱家經濟差市道又唔好，通縮已經係大勢所趨，哈！居然NBA嘅公鹿隊斗膽決定下季將門票加價，重加成一成四咁多㖭，撞鬼囉，呢支球隊近排愈打愈差，𠵱家重「逆流」玩加價呢樣嘢，我怕佢哋連擁躉都趕走埋，最後得不償失喎。