東方魅力嘅雙妹嘜張文慈同張慧儀，先後約滿走人，繼張文慈轉投中國星之後，張慧儀今個月都約滿，佢亦都唔再續約，選擇返無綫娘家。
其實張慧儀喺東魅兩年，真係冇乜嘢做，只係拍過電視劇《新楚留香》同埋亞視嘅《星光伴我行》，唔續約絕對係明智啦！
馮仁昭同張慧儀通電話，佢話：「呢兩年我同陶大宇都拍過一套電影嘅，不過最後冇出到街，其實我同公司冇唔開心，不過如果做嘢可以充實啲就會好啲，呢兩年我身體都唔好，當休養吓囉，我又可以趁空檔去學跳舞，如果遲啲無綫有需要搵人表演跳舞，可以考慮吓我㗎！
「今次我同無綫簽部頭，大家都好有誠意，返去嘅感覺好似返娘家咁親切，應該好快我就會拍番劇嘅嘞。」
台灣人氣組合F4首次參與新城娛樂台廣播劇《新歌首本劇~F４流星愛語》嘅演出，該劇下個禮拜一喺新城播出。而F4成員周渝民早前接受新城訪問時就話，如果佢遇到喜歡嘅女仔時，佢會毫不保留地同個女仔示愛，重會同佢講：「我喜歡你，我們交往吧！」但係如果佢同好朋友同時愛上一個女仔時，佢就會選擇退出。
賈思樂（右）冇做電台DJ，𠵱家籌備緊出隻EP，入面會收錄六首歌，佢老闆娘重指定要佢喺六首歌入面要有隻英文歌。賈思樂同馮仁昭講話因為間唱片公司細，冇乜資金，宣傳就要靠自己，佢𠵱家已經派咗隻新歌上電台，歌名叫做《半首歌》，但馮仁昭就未聽過，不過賈思樂肯為理想而努力，馮仁昭就好欣賞佢。
黎瑞恩﹙小恩子﹚下個月二十同二十一號喺紅館舉行「黎瑞恩夢成真演唱會」，佢噚日喺沙田馬場試婚紗，穿上婚紗後更坐喺古董馬車上。小恩子話架馬車會喺佢嘅演唱會中出現，佢話：「到時我重會着套有燈泡嘅婚紗，以前我都試過着婚紗，所以冇特別感覺。」
無綫節目《香港鬆一鬆》噚日錄影最後一集，除咗要返學嘅張如城外，其他演員都有出席。林敏驄話佢哋一班演員會喺四月初去內地登台，佢話：「我哋會去做六場，內容就未定，可能《香港鬆一鬆》，去到廣州就《廣州鬆一鬆》，去到江門就《江門鬆一鬆》。」